Հին ու նոր ԲՀԿ-ականների տունը կռիվ է ընկել: Կողմերն իրար մեղադրում են պայմանավորվածություններ խախտելու համար: Համաձայն ԲՀԿխմբակցության ղեկավար Նաիրա Զոհրաբյանի վարկածի, նա նույն խմբակցության պատգամավոր Տիգրան Ուրիխայանի հետ պայմանավորվածություն է ունեցել, որ վերջինս պետաիրավական հանձնաժողովում Մարդու իրավունքների պաշտպանի թեկնածու պետք է ներկայացնի Մակար Եղիազարյանին: Սակայն հենց վրա է հասել պահը, Ուրիխանյանը ոչ թե Եղիազարյանի, այլ իր ղեկավարած «Ալյանս» կուսակցության քաղաքական խորհրդի անդամ Նարեկ Ալոյանի թեկնածությունն է ներկայացրել:

Մինչ կողմերը արարքը որակող հարմար մակդիրներ էին ընտրում, «Այլանս»-ը շտապեց հանդես գալ հայտարարությամբ, որտեղ ասվում էր. «Քննարկումները մինչ օրս շարունակվել են, իսկ պայմանավորվածություն, որ ԲՀԿ-ի թեկնածուին պետք է առաջադրի «Ալյանս»-ի ղեկավար Տիգրան Ուրիխանյանը՝ չի եղել: Ով պնդում է հակառակը՝ ստում է, ապացույցները պատրաստ ենք ներկայացնել»:

Ներկա դեպքում ապացույցներն այնքան էլ էական չեն: Քչերին է հետաքրքրելու, թե նրանցից ով է իրավացի, իսկ ով է կեղծում փաստերը: Ի վերջո, դեռ ժամանակ կա, ԲՀԿ-ն կարող է առաջադրել սեփական թեկնածուին: Շատ ավելի կարևոր է հերթական անգամ արձանագրել այն հանգամանքը, թե «Բարգավաճ Հայաստանը» ինչու կազմաքանդվեց:

Ծառուկյանի հիմնած կուսակցությունը նախ փլուզեցին ներսից, հետո միայն այն կտոր-կտոր եղավ մի փոքրիկ ցնցումից, քանի որ ներսն արդեն անկայուն էր, քանի որ ներսում հավաքվել էին անվստահելի, ինտրիգան, խոսքի ու գործի արժեքը բնավ չհասկացող ու չգնահատող մարդիկ: Հիմա նրանք ընդամենը դրա պտուղներն են քաղում և բերքահավաքն ընթանում է նույն՝ դառնապտուղ ծառից:

Shame.am