Մինչ մենք տարբեր կերպ փորձում ենք մեր տեղն ու դիրքը պարզել աշխարհի պետությունների շարքում՝ ավելի հաճախ ազգային սնապարծությամբ հենվելով մեր բազմադարյա մշակույթի ու գենետիկ հանճարեղ ուղեղի հնարավորությունների վրա, հրապարակվել է Կարգին երկիր ինդեքսը (goodcountry.org), որում ընդգրկված է 125 պետություն: Կարգին երկիր ինդեքսը, նկատի առնելով տարբեր ոլորտներ, փորձում է որոշել տվյալ երկրի քաղաքակրթության բերած նպաստը մարդկությանն ու ամբողջ մոլորակին:

Վերջին շրջանում մամուլը հանիրավի քննադատության ենթարկեց մեր մշակույթի ոլորտը` կապված հայ-մադագասկարյան համաձայնագրի հետ: Սակայն պետք է ողջունենք Հասմիկ Պողոսյանի այս նախաձեռնությունը, քանի որ մշակույթի ոլորտում Հայաստանն ընդամենը 98-րդ է, իսկ Մադագասկարը` 71-րդը: Մշակութային առումով մեզանից բարձր հորիզոնականներում են գտնվում նաև Մոզամբիկը, Զիմբաբվեն, Զամբիան, Տոգոն, ուստի անհապաղ պետք է նրանց հետ ևս կնքել փոխգործակցության համաձայնագիր և շփվել աշխարհին ավելի շատ պիտանի մշակույթների հետ:

Ավելի ցավալի են առողջապահության խնդիրները մեզանում: Աշխարհն այստեղ ևս մեզ չի գնահատում: Թեպետ մենք Լևոն Տեր-Պետրոսյանի նման թանկ հաճախորդներ ենք մատուցում աշխարհին և առողջապահության ոլորտ ենք բերել Սամվել Ալեքսանյանի նման հանճարեղ բիզնեսմենին, այնուամենայնիվ, 125-ի մեջ Հայաստանն ընդամենը 110-րդն է:

Էկոլոգիայի ոլորտում 95-րդն ենք: Անգամ Ադրբեջանն այս ոլորտում մեզանից առաջ է: Ճիշտ է, Ադրբեջանն ընդամենը 94-րդն է, սակայն հաշվի առնել է պետք, թե Ադրբեջանի նավթահանքերը որքան են աղտոտում շրջակա միջավայրը: Համաձայնեք, որ առանց նավթահանքերի շրջակա միջավայրի նկատմամբ այս անհոգությունն անթույլատրելի է:

Այսքան բացասական երևույթների ինդեքսավորումից հետո թե ինչպես է պատահել, որ բարգավաճում և հավասարություն կատեգորիայում հայտնվել ենք 15-րդ տեղում՝ դժվար է ասել: Խաղաղության և անվտանգության բերած ավանդի համար՝ 39-րդ տեղում, իսկ արտասահմանում սովորող ուսանողների թվաքանակի աճի համար կրթության ոլորտում հայտնվել ենք 50-րդ հորիզոնականում:

Այս բոլոր կատեգորիաների հանրագումարով Հայաստանն ընդհանուր ցուցակում հայտնվել է 72-րդ տեղում: Կարող էինք նաև ավելի ցածր հորիզոնական զբաղեցնել, հեչ բան է: Կարևորն այն է, որ հանրագումարային ցուցակում Վրաստանը, Ադրբեջանը և Թուրքիան մեզանից հետ են, չէ՞ որ մեր թիվ մեկ գերխնդիրը սա է, իսկ թե ինչ է կատարվում մշակույթի, առողջապահության, բնապահպանության ոլորտում՝ այնքան էլ էական չէ:

Shame.am