Կրթության և գիտության նախարարի համար նոր տարին ձախորդություններով է սկսել: Դեռ տարվա առաջին շաբաթը նոր է լրացել, իսկ նա հասցրել է փորձանք փորձանքի ետևից ճաշակել: Սկզբում ընկավ ու ոտքը կոտրեց, իսկ հետո էլ որոշեց ուսումնական տարվա ընթացքը կոտրել: Հաշվի առնելով, որ հանրապետությունում շնչառական հիվանդությունների համաճարակի վտանգ կա, նախարարը հրաման արձակեց դպրոցներում ձմեռային արձակուրդները երկարաձգելու մասին:

Այն, որ այդպես վարվելու հիմքեր կային, սա վիճարկելի չէ: Սակայն այն, որ նույնիսկ ամենապարզագույն գործողությունը Աշոտյանի ձեռքում վերածվում է շիլաշփոթի, դա նույնպես անվիճելի փաստ է: Ու հիմա էլ եղավ ճիշտ այդպես: Մինչ նա տարված է ֆեյսբուքյան իր էջում հերթական գրառումները կատարելու ծանրագույն հոգսով, Հայաստանի մի շարք մարզերում այսօր աշակերտներն ու ուսուցիչները դպրոց գնացին:

Իհարկե, չի բացառվում, որ շատերի համար Աշոտյանի որոշումներն ու հրամաններն արդեն արժեք չունեն, նրան ոչ ոք լուրջ չի ընդունում, և մարդիկ վարվում են այնպես, ինչպես իրենց է հարմար: Բայց մյուս կողմից էլ՝ նման խառնաշփոթի պատճառն այն է, որ ՀՀԿ-ական երիտնախարարը հարկ չի համարում առկա խնդիրները խորապես ուսումնասիրել, իսկ մակերեսային մոտեցումներն իրենց հերթին հանգեցնում են տարատեսակ բացատրությունների: Օրինակ, Կոտայքում հարմար են գտել առաջնորդվել ոչ թե Աշոտյանի պահանջով, այլ սեփական նպատակահարմարությամբ և արձակուրդը երկարաձգելու որոշում նրանք կկայացնեն առաջիկայում, իրենց ուժերով: Իսկ ահա Լոռու մարզպետարանից հայտնել են, որ պաշտոնական հրաման իրենք չեն ստացել: Այն տեղադրված չէ նաև կրթության և գիտության նախարարության պաշտոնական կայքէջում:

Այս ընդհանուր ֆոնի վրա պակաս արտառոց չէ Կրթության և գիտության նախարարության այն պարզաբանումը, թե արձակուրդը երկարաձգելու վերաբերյալ նախարարի գրառումը չի վերաբերում, համայնքային ենթակայության հաստատություններին: Ասել կուզի` տեղական ինքնակառավարման մարմիններն իրենք կարող են ընդունել համապատասխան որոշում: Մարզպետարաններում, սակայն, իրենց հերթին նկատում են, որ այդ տրամաբանությամբ առաջնորդվելու դեպքում նախարարի գրառումը պետք է վերաբերեր միայն ավագ դպրոցներին, որովհետև մնացած բոլոր` հիմնական դպրոցները նույնպես համայնքային ենթակայության են, այնինչ դրանց վերաբերյալ նույնպես նախարարը որոշում կայացրել է:

Մի խոսքով, կամ Աշոտյանը չգիտի՝ ինչն է իրենը և ինչն իրենը չէ, կամ էլ նրա մոտ արդեն խրոնիկ իրավիճակ է ստեղծվել. այս տղան ինչ անում է՝ միշտ վատ է ստացվում: