Երբ կայանում էր ՀՀԿ-ՀՅԴ միացման ակտը, ոչ մեկի մտքով չէր կարող անցնել, թե այդ համագործակցությունն ուրիշ ինչպիսի դրսևորումներ կարող է ունենալ: Իսկ հիմա մենք կարող ենք վստահաբար ասել, որ նրանց դաշինքը ոչ միայն երևակայությունից վեր է, այլև երևակայությունից ներքև, այսինքն` փողոցում: Իսկ թե ինչպես՝ հիմա կիմանաք:

Հայտնի է դարձել, որ Երևանի քաղաքապետարանը այս տարի նախատեսել է գնել գերթանկարժեք նստարաններ ու աղբամաններ: Լրագրողներին հաջողվել է պարզել, որ նստարանների, աղբամանների և այլնի համար հատկացվել է 163 մլն 330 հազար դրամ: Սա ահռելի գումար է: Բայց ինչպե՞ս կարող է չլինել ահռելի, եթե յուրաքանչյուր նստարանը արժե 165.000, իսկ աղբամանը՝ 77.000 դրամ:

Հիմա կհարցնեք, բայց ինչո՞ւ այդքան թանկ, եթե կարելի է նույն գումարով գնել երկու կամ երեք նստարան և նույնքան էլ աղբաման: Եվ հենց այստեղ էլ կբացահայտվի գաղտնիքը՝ մեզ բոլորիս տանելով դեպի ՀՀԿ-ՀՅԴ դաշինքի ակունքները: Իսկ գաղտնիքը հետևյալն է. քաղաքապետարանը որոշել է ձեռք բերել «Երևան» ձուլվածքով նստարաններ ու նմանատիպ աղբամաններ՝ դրանց պատրաստման համար ընտրելով «Նիկոլ Դուման» առևտրային կազմակերպությունը:

Մենք չենք անդրադառնա այն հարցին, թե այդ ո՞ր խելոքի մտքով է անցել աղբաման պատրաստող կամ վաճառող կառույցին «Նիկոլ Դուման» անունը տալ և կամ ի՞նչ են ցանկացել դրանով ասել: Մենք ընդամենը կմեջբերենք լրագրողների բացահայտումը, ովքեր ՀՀ պետական ռեգիստրից տեղեկացել են, որ «Նիկոլ Դուման» ընկերության հիմնադիրներն են Կառլեն Գևորգյանը, Վարդան Վարդանյանը և Արսեն Հայրապետյանը: Վերը հիշատակված Կառլեն Գևորգյանը ՀՀ քաղաքաշինության նախկին փոխնախարարն է, ԱԺ ընտրություններում թիվ 12 ընտրատարածքում մեծամասնականով առաջադրված պատգամավորության թեկնածու, ՀՅԴ անդամ:

Ավելին ասելու կարիք կա՞: Կարծում ենք, չէ: Մնացածը ինքներդ հասկացեք:

shame.am