Ամուսնու կողմից դանակի 21 հարվածով սպանված Դիանա Նահապետյանի մոր «վրաս  էժան չի նստել» այն փաստը, որ դստեր սպանության մեջ մեղադրվող իր նախկին փեսան ընդամենը  3 ու կես տարի ազատազրկման է դատապարտվել:

NEWS.am-ի հետ զրույցում Վալյա Նահապետյանը տեղեկացրեց, որ ապրումներից նախորդ ամիս գանգուղեղի կաթված է ստացել:

«Էդ սրիկան էդքան քիչ դատապարտվեց, քի՞չ բան է մտածելու: 3 տարի ես էդ անասունի հետ նստեցի` դատարաններ գնալ-գալով: Ու դատարանը 3 ու կես տարի տվեց, որից 3 տարին արդեն նստել է, 5 ամսից դուրս կգա, իսկ դա իմ վրա էժան չնստեց, ինսուլտ տարա, հազիվ կյանքս փրկեցին»,-ասաց սպանված Դիանա Նահապետյանի մայրը:

Վալյա Նահապետյանը նշեց, որ վճիռը բողոքարկելու անհրաժեշտություն չի տեսնում, քանի որ «էս երկրում օրենքներ չկան»:

Նշենք, որ կնոջը սպանելու մեջ մեղադրվող Վոլոդյա Մուրադյանին առաջադրված մեղադրանքը մեղմացվել էր, քանի որ դատահոգեբանական եւ դատահոգեբուժական համալիր փորձաքննությունը ապացուցված էր համարել, որ վերջինը արարքը կատարելու պահին եղել է աֆեկտի վիճակում, մինչդեռ 1-ին փորձաքննության եզրակացության համաձայն` Վոլոդյա Մուրադյանը չի եղել աֆեկտի վիճակում:  Վոլոդյա Մուրադյանին նախկինում մեղադրանք էր առաջադրվել ՀՀ ՔՕ 104 հոդվածի 2-րդ մասի 5-րդ կետով՝ առանձնակի դաժանությամբ սպանություն, որը պատժվում է 12-20 տարի ժամկետով կամ ցմահ ազատազրկմամբ: Մեղադրանքը փոփոխվելուց հետո նա մեղադրվում էր ՀՀ Քրեական օրենսգրքի 105-րդ հոդվածի 1-ին մասով, այն է` հանկարծակի առաջացած հոգեկան խիստ հուզմունքի վիճակում կամ տուժողի դրսեւորած հակաիրավական կամ հակաբարոյական պարբերական վարքագծի կապակցությամբ առաջ եկած երկարատեւ հոգեճնշող վիճակում կատարված սպանություն, որը պատժվում է ազատազրկմամբ՝ առավելագույնը 4 տարի ժամկետով:

Հիշեցնենք, որ ըստ մեղադրական եզրակացության, Դիանայի ամուսինը` 51-ամյա Վոլոդյա Մուրադյանը, 2012թ. դեկտեմբերին առանձնակի դաժանությամբ սպանել էր իր կնոջը: Սկզբում ծաղկամանով հարված էր հասցրել վերջինիս գլխին, այնուհետեւ ոտքով հարվածել ծնոտին եւ մարմնի այլ մասերին, իսկ վերջում քարշ էր տվել խոհանոց եւ 21 դանակի հարված հասցրել: Վերոնշյալ տեսարանին ականատես էին եղել Դիանայի 14-ամյա եւ 17-ամյա դուստրերը, ովքեր դուրս են վազել բնակարանից եւ հարեւաններից օգնություն խնդրել: Վոլոդյա Մուրադյանը հաստատել էր, որ կնոջն ինքն է սպանել, սակայն անգիտակցաբար:

News.am