Հայաստան 2025թ. հակաուտոպիական ակնարկ

 

- Բարև ձեզ, սիրելի՛ հեռուստադիտողներ: Այսօր ՀՀԿ քաղաքական դպրոցն ավարտեցին հերթական շրջանավարտները: Մեր հաղորդման հյուրն է դպրոցի շրջանավարտ Կալբաս Աբոն: Ողջունում եմ Ձեզ, պարո՛ ն Աբո:

 - Ես էլ: -

Ինչու՞ որոշեցիք քաղաքականությամբ զբաղվել:

 - Ինչպես մեր դպրոցի ռեկտորն ա ասում՝ եթե դու չես սպանում քաղաքականությանը, քաղաքականությունն է սպանում քեզ:

 

- Ի՜նչ հետաքրքիր է:

 - Հետաքրքիր բան չկա, ամեն մեկս մեր գործն ենք անում:

 

- Ի՞նչ տվեց Ձեզ ՀՀԿ քաղաքական դպրոցը:

 - Ցավդ տանեմ, նենց չի, որ մենք գնացել էինք, որ մեզ ինչ-որ բան տային: Մենք սրտանց ու անշահախնդիր՝ մեր կուսակցության կողքը կանգնած ենք միշտ, ուր որ պետք ա՝ կմտնենք ու կհելնենք:

 

- Բայց գիտելիքը, չէ՞ որ դպրոցը պետք է գիտելիք տա:

 - Է թող տա, ո՞վ ա իրան խանգարում:

 

- Ի՞նչ առարկաներ էին դասավանդում ՀՀԿ քաղաքական դպրոցում, պարո՛ն Աբո:

 - Տարբեր:

 

- Ձեր ամենասիրելի առարկան ո՞րն էր:

 - Իմս՝ Բյուջեյի հարաբերականության տեսությունը ատկատի ծիրում:

 

- Կարո՞ղ եք մանրամասնել:

 - Դե ասենեք թե, եթե բյուջեն 4 միլիարդ ա, ոնց էն գլխից 1 միլիարդ ֆրթցնել, բայց որ տակը մնա էլի 4 միլիարդ:

 

- Եվ ինչպե՞ս անել:

 - Չեմ կարող ասել, դա մասնագիտական գաղտնիք ա, դարձե՛ք ՀՀԿ-ական՝ կիմանաք:

 

- Իսկ դուք ի՞նչ ստացաք այդ առարկայից:

 - Դե, տեսականի մասով 5, բայց դեռ պրակտիկա պետք ա անցնենք մագիստրատուրայում:

 

- Որտե՞ղ:

 - Ես գյուղատնտեսության նախարարությունում, այնտեղ նկատվում է ատկատի հարաբերականության կրիտիկական մակարդակ՝ դաշտային աշխատանքների համար: Դե բացի դրանից էլ՝ իմը կալբասի գծով ա էլի:

 

- Իսկ ձեր դպրոցից դուրս մնացողներ եղա՞ն այս տարի:

 - Հա, ոնց չէ: Խզիկ Կամոն կտրվեց՝ Քֆուրի պատմություն և տեսություն առարկայից:

 

- Ինչու՞:

 - Դասախոսը քրֆեց, ինքը աբառոտկա չխլեց, կուլ գնաց: 

 

- Հետո՞:

 - Էլ ի՞նչ հետո, դասախոսն ասեց՝ ա՛յ դիշովկա, եթե էսօր դու ստեղ սենց պարկեշտ ես, բա վաղը ոնց ես անելու Ազգային Ժողովում, քո նմանները մեր մեջ տեղ չունեն, ու լարեց դպրոցից:

 

- Ձեր դպրոցի պատին գրված է՝ Ամեն ինչ լավ ա, եթե նույնիսկ ամեն ինչ վատ ա, միևնույնն ա՝ ամեն ինչ լավ ա: Սա ավելորդ լավատեսություն չէ՞:

 - Չէ այ հոգուդ ղուրբան, սա իրատեսություն ա, ոչ թե լավատեսություն:

 

- Էդ ո՞նց:

 - Դե հա՝ եթե ժողովրդի համար ամեն ինչ վատ ա, ուրեմն մեր համար լավ ա էլի: Ենթատեքստը չեք ջոգում:

 

- Իսկ ի՞նչ գրքերով եք տալիս ձեր քննությունները:

 - Քաղաքական հռետորաբանության մետաֆիզիկական սուբստանցիան. ինչպե՞ս ասել ամեն ինչ, բայց ոչինչ չասել, հեղինակ՝ Գալուստ Սահակյան:

 

- Որտեղի՞ց կարող ենք գնել գիրքը:

 - Չեք կարող գնել, պետք է ընդունվեք ՀՀԿ քաղաքական դպրոց:

 

- Իսկ ինչպե՞ս ընդունվել:

 - Պետք ա մտնեք մեր կայք ու թեստ լրացնեք, կոչվում ա՝ գաղջաթեստ: Եթե պարզվեց, որ ձեր հոգում գաղջի քանակությունը ձգտում է կրիտիկական նվազագույնի, ուրեմն չեք կարող ընդունվել, դուք անհույս եք:

 

- Իսկ որքա՞ն է ուսման վարձը:

 - Վարձը տալու եք ամբողջ կյանքի ընթացքում, իսկ թե ոնց՝ կասի ՀՀԿ ցմահ պարտապանների վարչությունը:

 

- Իսկ Դուք պատրաստվու՞մ եք մասնակցել առաջիկա ընտրություններին:

 - Հա բա ոնց, ես գերազանցությամբ եմ ավարտել՝ Ընտրակաշառքների անատոմիա առարկան, բա եթե ոչ ես, ապա ո՞վ:

 

- Պարո՛ ն Աբո, վերջում ի՞նչ կմաղթեք մեր հեռուստադիտողներին:

 - Ձեր հեռուսուստադիտողներին կմաղթեմ համբերություն, քանի որ, ՀՀԿ-ն եղել է, կա և կմնա՝ շնորհիվ հեռուստադիտողների համբերության: