«Հրապարակ»-ը գրում է. «Հայ կանանց ճակատ» նախաձեռնության անդամ Սյուզան Սիմոնյանը դատի է տվել ոստիկանությանը։ Դատական այս հայցի նախապատճառը Սփյուռք-Հայաստան համաժողովի ժամանակ տեղի ունեցած միջադեպն է, երբ Սյուզան Սիմոնյանը փորձել էր Ժիրայր Սեֆիլյանի լուսանկարով փոքրիկ ակցիա իրականացնել՝ արտասահմանում բնակվող մեր հայրենակիցներին տեղեկացնելու համար, որ Հայաստանում քաղբանտարկյալներ կան։
«Մեր հայցադիմումը վերաբերում է ՀՀ ոստիկանության գործողությունները ոչ իրավաչափ ճանաչելուն և ոչ գույքային վնասի հատուցմանը պարտավորեցնելու պահանջի մասին»․- hraparak.am-ի հետ զրույցում նշեց Սյուզան Սիմոնյանը, նա վերհիշեց սեպտեմբերի 20-ին տեղի ունեցած իրադարձությունները, ընդգծելով, թե ոստիկանությունն այս գործողություններով իր անբարո դեմքն է ցույց տալիս՝ կանանց այդպիսի վիճակի հասցնելով։
««Հայ կանանց ճակատի» կողմից նախապես կազմակերպված էր հավաք անցկացնել Հանրապետության հրապարակի շատրվանների մոտ։ Ես եկա այն պահին, երբ դեռ չէին եկել աղջիկները, այսինքն՝ տարածքում էին, բայց ես իրենց չէի տեսնում։ Եվ ուրեմն այդ պահին, որ ես բացեցի այդ մետաքսի կտորից Ժիրայր Սեֆիլյանի նկարը, հենց բացելս անմիջապես սկսեցին ֆիզիկական ուժ գործադրել և առանց պարզաբանման ինձ քաշեցին դեպի ոստիկանական մեքենան, ասելով՝ տարեք սրան բաժին։ Ինձ մտցրեցին մեքենան, բայց այդ ընթացքում ինձնից խլում էին Սեֆիլյանի նկարը, տեսանյութում էլ է երևում։ Հետո տեսան չեն հաջողում, ինձ այդպես քաշելով գլուխս խփելով մեքենային, այնտեղ շատ պարզ երևում է, թե ինչպես են իմ գլուխը խփում մեքենային, ինձ մտցրեցին մեքենան»․- պատմում է տիկին Սյուզանը, վերջինս մեքենայի մեջ գտնվելու ընթացքում իրեն վատ է զգացել։
Նրա խոսքերով՝ ոստիկաններին հետագայում թելադրել են չտեղափոխել իրեն ոստիկանության բաժանմունք․ «Եկան Մատենադարանից մի քիչ ներքև, ընդ որում, երբ ինձ նստեցրեցին մեքենա, ամենավերջին պահն իմ կողքը բարձրացավ մի երիտասարդ աղջիկ ոստիկան, փորձում էր հեռախոսս խլել, այնտեղ տեսանյութի մեջ էլ է լսվում, որ ես ասում եմ՝ ձեռք չտաս իմ հեռախոսը, դու իրավունք չունես իմ հեռախոսին ձեռք տալ, ինքն անմիջապես ձեռքը քաշեց։ Երբ կանգնեցին, սիրտս վատացել էր, ինքն ինձ իհարկե փորձում էր ուշքի բերել, այդ աղջիկը, հետո երբ որ արդեն խելքի եկա, սկսեցի նկարել, որովհետև չգիտեի թե ինձ ուր են տանում։ Այդ աղջիկն իջավ ու դռան մոտ կանգնած ինձ ասաց՝ տիկի՛ն ջան, իջեք, թյուրիմացություն է եղել։ Ի՞նչ է նշանակում թյուրիմացություն է եղել, ուրեմն դուք ինձ այս վիճակի մեջ գցեք, հետո ասեք թյուրիմացությո՞ւն, ես խաղալի՞ք եմ, ինչ է»։ Մեկ ժամից ավել չկարողանալով կնոջն իջեցնել մեքենայից, ոստիկանները հրավիրել են, ինչպես Սյուզան Սիմոնյանն է ասում՝ աժդահա մի ոստիկանի․ «Ինձ քաշելով գցեցին դուրս մեքենայից և այնպիսի արագությամբ ծլկեցին»։
Տիկին Սյուզան բազմիցս հայտարարել եք, որ մեր արդարադատւթյան համակարգին չեք վստահում, այս հայցով հույս ունե՞ք հասնել արդարության․ «Իհարկե, հույսեր չունեմ, բայց ես չեմ կարող լռել, պիտի ցույց տամ, պիտի գոնե գրանցվի այդտեղ, որովհետև ես մինչև վերջ գնալու եմ, որքան ինձ տրվում է իրավունք բողոքի։ Օրերս մեր կանայք ակցիա էին իրականացրել ԱՄՆ-ում, ուղղված Գարեգին Բ-ի դեմ, տեսանյութի մեջ լսեցի, որ ոստիկանն ասաց՝ իմ գործն այստեղ այն է, որ բախումը կանխեմ։ Իսկ ի՞նչ է անում մեր ոստիկանությունը, նա բախումը կանխո՞ւմ է, մինչև հիմա բախում կանխող է եղե՞լ, թե՞ բախում հրահրող»։