«Հրապարակ»-ը գրում է. Քիչ առաջ «Սասնա ծռեր» խմբի անդամների համակիրները «Ֆեյսբուք» սոցիալական ցանցում տարածել են հետեւյալ հայտարարությունը․ «Ծառայությունների 37-թվականին հարիր գործելաոճը շարունակում է հիմնավորապես հաստատվել Հայաստանում։ Այսօր՝ հոկտեմբերի 6-ի գիշերը, անհայտ անձինք փորձել են ներթափանցել Վարուժան Ավետիսյանի ընտանիքին պատկանող բնակարան, երբ ընտանիքի անդամները քնած են եղել։ Բնակարանի մուտքի դռան կողպեքի պտուտակները Վարուժան Ավետիսյանի ընտանիքի անդամները քանդած են հայտնաբերել առավոտյան։
Դեպքը խոսում է նարիմանովյան ծառայությունների փնթի, անպատասխանատու, ապօրինի և հանցավոր գործելակերպի մասին և հանդիսանում է ընտանիքի և անձի իրավունքների կոպիտ ոտնահարում։ Ծառայությունները ամենայն հավանականությամբ տեղեկատվական քաղց են ապրում և նպատակ են հետապնդել ներթափանցել բնակարան, տեղեկություններ հայթայթել և ձեռք բերել Սասնա Ծուռ Վարուժան Ավետիսյանի նամակներից կամ փաստաթղթերից և/կամ տեսանկարահանող կամ գաղտնալսով սարքեր տեղադրել»։

Վարուժան Ավետիսյանի շահերը ներկայացնող փաստաբան Մուշեղ Շուշանյանը մեզ հետ զրույցում նշեց, որ ինքը նշված տեղեկատվությունից ավելիին չի տիրապետում։
«Առավոտյան Վարուժանի ընտանիքի անդամները նկատել են, որ կողպեքը վնասված է, կողպեքը քանդելու փորձ է կատարվել»,- ասաց մեր զրուցակիցը։ Հարցին, թե ինչ են պատրաստվում անել, փաստաբանն ասաց․ «Արդեն հայտարարություն է տարածվել տեղի ունեցածի վերաբերյալ։ Եթե նկատի ունեք, որ դիմելու ենք իրավապահ մարմիններին, ապա նման դիմում չենք ներկայացնի։ Մենք վստահ ենք, որ բնակարան մուտք գործելու փորձը կատարվել է իրավապահ կոչվող մարմինների կողմից։ Դրա համար իրենցից պաշտպանություն ակնկալել չենք կարող։ Հայտարարությունը հրապարակվել է, եթե իրենք կգտնեն, որ իրենց իրավասության շրջանակներում գործողություններ պետք է կատարեն, իրենց խնդիրն է»։ Նա հավելեց, որ ո՛չ ինքը, ո՛չ էլ Վարուժան Ավետիսյանի ընտանիքի անդամները չեն վստահում իրավապահ մարմիններին: