Սեպտեմբերի 1-ից ընտանեկան նպաստի համակարգում ընդգրկված քաղաքացիները պարտավոր են սոցիալական ծառայության համապատասխան ստորաբաժանում ներկայացնել ընտանիքի բացակա անդամի գտնվելու վայրի մասին տեղեկանք: Պարզվում է, որ սա արվում է, որպեսզի պետությունը տեղյակ լինի, թե նպաստ ստացող ընտանիքի անդամներից որեւէ մեկը`հիմնականում ընտանիքի հայրը գտնվում է արտագնա աշխատանքի, թե`ոչ: Այս համակարգի ներդրման միակ նպատակն այն է, որ սոցիալական ծառայությունում կարողանա վերահսկել, թե նպաստ ստացող ընտանիք ինչ եկամուտ է մտնում:
Սահմանված կարգի համաձայն`բացակայության 3-րդ ամսում, ընտանիքի անդամների կողմից պետք է պարտադիր համապատասխան դիմում ներկայացվի, թե որքան է կազմում արտերկրից ուղարկվող եկամուտը:
ՀՀ սոցապնախարար Արտեմ Ասատրյանն այսօր ԱԺ-ում այս թեմայի շուրջ armtimes.com-ի հետ զրույցում մեկնաբանեց այս նորամուծության նպատակը:
«Ընտանիքները դիմում են նպաստ ստանալու համար եւ պետք է հստակ ճշտենք նրանց անապահովության աստիճանը: Անապահովության աստիճանի տեղեկատվության ճշգրտման շրջանակն ընդլայնվում է: Այս աշխատանքները շարունակական բնույթ են կրում»,- նշեց նախարարը:
Armtimes.com-ի այն հարցադրմանը, թե դա արվում է, որ նվազեցվեն նպաստ ստացող ընտանիքների թիվը, նախարարը ջղաձգվեց, իսկ մեր հարցն արհեստական որակեց.
«Ձեր հարցադրումը շատ արհեստական է, ի՞նչ է նշանակում` զրկվելու են ընտանեկան նպաստից...»,- ասաց ու հեռացավ նախարար Ասատրյանը: