«Այն ինչ հիմա տեղի է ունենում, դատական գործընթաց անվանել հնարավոր չէ, որովհետև այդ ամենն արդարադատության հետ որևէ կապ չունի»,- «Առաջին լրատվական»-ի հետ զրույցում նման համոզմունք հայտնեց իրավապաշտպան Վարդան Հարությունյանը՝ խոսելով «Սասնա ծռեր» խմբի գործով ընթացող դատական նիստերի մասին։

Վերջինս նաև հավելեց․«Դատական պրոցես, որտեղից որ վտարվում են փաստաբանները, մեղադրյալները և դատարանի դահլիճում, ըստ էության, մնում են դատավորը, դատախազը և ուրիշ ոչ ոք, դա դատական պրոցես անվանել հնարավոր չէ։ Առաջին հերթին պետք է շեշտեմ, որ այն ամենը, ինչ կատարվում է փաստաբանների հետ, դա արդեն վկայում է այն մասին, որ դա դատական պրոցես չէ, և մեղադրյալների նկատմամբ պերմանենտ կիրառվող այդ սանկցիաները խոսում են այն մասին, որ արդարադատության մասին խոսք չկա։

Այստեղ խոսք կա վրեժխնդրության մասին, խոսք կա ինչ-որ իմիտացիայի մասին, բայց ոչ երբեք դատական պրոցեսի»։

Իրավապաշտպանը վստահ է, որ եթե դատարանն իր առջև խնդիր դնի, որ այսուհետ այս գործով դատավարությունները պետք է դռնփակ ռեժիմով ընթանան, ապա, անկասկած, կարող են հասնել նաև դրան։

«Ուղղակի դատարանի դահլիճում լինում են մարդիկ, ովքեր համակրում են «Սասնա ծռեր»-ին, ոգևորում են նրանց և իշխանություններն էլ դա չեն ցանկանում հանդուրժել և ամեն ինչ անում են, որպեսզի հնարավորություն ունենան դատական նիստերը դռնփակ անել հենց այն պահից սկսած, որը իրենք հարմար կհամարեն։ Բոլոր քաղաքական դատավարություններն էլ Հայաստանում ընթացել են այս սցենարով, ուղղակի հիմա մեղադրյալների թիվն է շատ և կայացվող սանկցիաների թիվն է շատ ու ճչացող»,- շեշտեց Վարդան Հարությունյանը։

Շարունակությունը՝ այստեղ