«Հայկական ժամանակ»-ը գրում է.

ԱԺ «Ելք» խմբակցության ղեկավար Նիկոլ Փաշինյանը ԱԺ-ի մշտական հանձնաժողովների համատեղ նիստում հակադարձելով փոխոստիկանապետ Անուբախ Համբարյանի հայտարարությանը, թե ոստիկանությունը չի կարող ասել՝ «Սասնա ծռեր» խմբի անդամների նկատմամբ ծեծի գործով միջադեպ եղել է, թե՝ ոչ, ասաց. «Չեք կարծո՞ւմ, որ շատ վատ է, որ ոստիկանությունը դեպքի հանրային ահազանգից 24 ժամ հետո դեռ չի կարող նույնիսկ ասել՝ միջադեպ եղել է, թե՝ ոչ»:
Հիշեցնենք, որ պատգամավոր Մանե Թանդիլյանի հարցին ի պատասխան Անուբախ Համբարյանն այսօր ասել էր. «Մենք չենք կարող ասել՝ միջադեպ եղել է, թե՝ ոչ, իհարկե, ահազանգ եղել է»:
Նիկոլ Փաշինյանը փոխոստիկանապետին տեղեկացրեց, որ երեկ եղել է «Նուբարաշեն» քրեակատարողական հիմնարկում, որի վարչակազմն իրեն հավաստիացրել է, որ Արայիկ Խանդոյանը եւ Արեգ Կյուրեղյանը դատավարությունից վերադարձել են ՔԿՀ, այդ ընթացքում մշտապես եղել են ոստիկանության ուղեկցող գումարտակի հսկողության տակ, սակայն նրանց վրա կան մարմնական վնասվածքներ:
«Այսինքն՝ նրանք առանց մարմնական վնասվածքների դուրս են եկել քրեակատարողական հիմնարկներից, մարմնական վնասվածքներով վերադարձել են՝ այդ ողջ ընթացքում լինելով ոստիկանության ուղեկցող գումարտակի հսկողության տակ: Այս փաստը ձեզ ինչ-որ բան ասո՞ւմ է, գոնե կարո՞ղ ենք կռահել՝ միջադեպ եղել է, թե՝ ոչ»,- հարցրեց Նիկոլ Փաշինյանը:
«Ելք» խմբակցության ղեկավարը հարց հնչեցրեց նաեւ բնակարանային գողության դեպքերի բացահայտման վերաբերյալ՝ նկատելով, որ 2016 թվականին Հայաստանում տեղի է ունեցել 1250 բնակարանային գողություն, որի 67 տոկոսը չի բացահայտվել մինչեւ օրս: «Դուք Հայաստանում ուրիշ այդպիսի բիզնես գիտե՞ք, որ 37 եւ ավելի պակաս տոկոս ռիսկայնություն ունի: Սա չի՞ նշանակում արդյոք, որ ՀՀ-ում բնակարանային գողությունը ոստիկանության գործունեության պայմաններում դարձել է բավականին անվտանգ եւ շահավետ գործ»,- հարցրեց Նիկոլ Փաշինյանը:
Փոխոստիկանապետը պատասխանելով «Սասնա ծռեր» խմբի անդամների վերաբերյալ հարցին, ասաց, որ ահազանգը դեռ չի նշանակում, որ հանցագործություն է տեղի ունեցել: «Իհարկե, մենք գրանցել ենք, զբաղվում ենք, կլինի հանցագործություն, կհաստատվի՝ կպատժվեն: Մենք ունենք ահազանգ, որով զբաղվում ենք, նշանակվել է ծառայողական քննություն»,- ասաց Անուբախ Համբարյանը:
Վերջինիս խոսքով, բնակարանային գողության դեպքերն անհանգստացնում են ոստիկանությանը, բայց դրա հետ մեկտեղ 2017 թվականի առաջին 6 ամսվա ընթացքում 210 բնակարանային գողության դեպք է բացահայտվել: «Մենք 2016 թվականին բացահայտել ենք 840 հանցագործության դեպք նախկին տարիներից, որից մոտ 300-ը եղել է բնակարանային գողություն: Այս ուղղությամբ մենք անհանգստացած ենք, ղեկավարությունն անհանգստացած է բնակարանայի գողության դեպքերով: Այդ ուղղությամբ աշխատանքներ կատարվում են»,- ասաց Անուբախ Համբարյանը:
Արձագանքելով փոխոստիկանապետի՝ նախաքննության մասին արված հայտարարությանը, Նիկոլ Փաշինյանն ասաց. «Այդ տրամաբանությամբ ոստիկանության «02» հաղորդումը փակեք, որովհետեւ ինչ-որ դեպքեր են եղել, նախաքննությունը կպարզի՝ ինչ է եղել: Երբ որ ընդդիմությանն է վերաբերվում՝ կլիոմետրանոց հաղորդագրություններ՝ էս են արել, այստեղից մտել են, զենք, զինամթերք, բան: Բա այդ ժամանակ ինչի՞ չեք ասում, որ նախաքննությունը կպարզի, ոչ մի բան չենք ասում»: