Կառավարության առաջիկա նիստում կհաստատվան մի շարք փոփոխություններ՝ ոստիկանությունում ծառայություն անցնելու հետ կապված: Մասնավորապես՝ այսուհետ ոստիկանության ծառայությունից ազատվելու դեպքում ազատման հրամանով ուժը կորցրած է ճանաչվելու նաև կոչում շնորհելու մասին հրամանը, եթե այդ ազատումը կատարվում է փորձաշրջանը չանցնելու հիմքով/ «Ոստիկանությունում ծառայության մասին օրենքի 45-րդ հոդվածի 1-ին մասի 11.3-րդ կետ/ :

Ըստ ոստիկանության կողմից ներկայացված պարզաբանման՝ նշված փոփոխությունը պայմանավորված է Ոստիկանության ծառայաության մասին օրենքում կատարված վերջին փոփոխությամբ,  վարչապետի 02.03.2017թ. թիվ 204-Ա որոշմամբ, ինչպես նաև ամենօրյա աշխատանքում առաջացող խնդիրներով:

  Ոստիկանությունում ծառայության մասին  օրենքով նախատեսվում է, որ կառավարության կողմից սահմանված համապատասխան մասնագիտությամբ բարձրագույն կրթություն ունեցող անձանց համար, բացառությամբ ոստիկանության ուսումնական հաստատությունում պետական պատվերի շրջանակում կրթություն ստացածների, ոստիկանության միջին խմբի պաշտոններում նշանակելուց հետո սահմանվում է վեցամսյա փորձաշրջան: Նույն օրենքի 5-րդ հոդվածը  նախատեսում է, որ փորձաշրջանի արդյունքներից կախված,  ոստիկանությունում աշխատանքի չանցնելու և  ազատվելու դեպքում,  ոստիկանության կոչում շնորհելու մասին հրամանը ճանաչվում է ուժը կորցրած, ուստի նշված պահանջները պետք է նախատեսվեն նաև կառավարության համապատասխան կարգում:

«Ոստիկանությունում ծառայության մասին» օրենքի փոփոխություններով պայմանավորված՝  համակարգում արտամրցութային կարգով նշանակում չլինելու դեպքում մրցույթով համալրվելու են միայն ավագ և գլխավոր խմբերի թափուր պաշտոնները:

Սրանով պայմանավորված մրցույթ անցկացնելու կարգը և պայմանները ևս փոփոխվում են. նախատեսվում է ոստիկանության միջին, ավագ և գլխավոր խմբերի թափուր պաշտոն զբաղեցնելու համար մրցույթի գործող կարգից հանել միջին խմբի պաշտոններին վերաբերող դրույթները: Այս փոփոխությունը հուշում է, որ ոստիկանությունը կադրերի հանալրման խնդիր ունի և համակարգում կա արտահոսք, ինչով պայմանավորված միջին խմբի պաշտոնների համալրման նպատակով համակարգը փորձ է արվում բացել նաև համակարգից դուրս գտնվող անձանց համար:

Եթե կադրային ռեզերևում եղած կադրերը բավարարեին ոստիկանության թափուր տեղերը  արտամրցույթով համալրելու պահանջարկը, ապա նման քայլի գնալու անհրաժեշտություն հազիվ թե լիներ:

Միաժամանակ փոփոխություններ են կատարվում նաև ոստիկանության ծառայողի վերապատրաստում անցնելու կարգի և պայմանների մեջ:Ոստիկանությունում ծառայության մասին դեռևս նախկին օրենքով՝   կառավարության կողմից սահմանված համապատասխան մասնագիտությամբ բարձրագույն կրթություն ունեցող անձանց համար/ բացառությամբ ոստիկանության ուսումնական հաստատությունում պետական պատվերի շրջանակում կրթություն ստացածների/, ոստիկանության միջին խմբի պաշտոններում նշանակելուց հետո սահմանվում էր վեցամսյա փորձաշրջան, որից 3 ամիսը` վերապատրաստում:

Օրենքում կատարված փոփոխությունների  արդյունքում  նախատեսվել են պարտադիր վերապատրաստում անցնելու նոր դեպքեր, որոնք այժմ ամրագրվում են ոստիկանության ծառայողի վերապատրաստում անցնելու կարգում: Ըստ ներկայացված հիմնավորման՝ նախատեսվում է վերապատրաստում անցած ծառայողների հաշվառումն իրականացնել նաև էլեկտրոնային եղանակով,  հստակեցվում է վերապատրաստման կազմակերպման համար պատասխանատուների շրջանակը:

Հատկապես այս հիմնավորումը բավականին ուշագրավ է. եթե ոստիկանությունը նոր-նոր է մտածում վերապատրաստման  պատասխանատուների շրջանակի հստակեցման և  էլեկտրոնային եղանակով հաշվառման մասին, կնշանակի համակարգում մինչ այժմ քարե դար է եղել:

 Արման Վարդանյան

hayeli.am