«Իմ հասցեին հնչեցվել է սպանության սպառնալիք, և իրավապահ մարմինները, ոստիկանությունը պարտավոր են ընթացք տալ դրան»,- «Առաջին լրատվական»-ի հետ զրույցում ասաց իրավապաշտպան Արթուր Սաքունցը՝ հավելելով, որ ոստիկանությունը այսպես թե այնպես հետևում է Ֆեյսբուքին, գիտի բոլորի գրառումները և պարտավոր է ընթացք տալ այս ամենին:
Նշենք, որ հունիսի 2-ին իրավապաշտպանը գրառում էր կատարել սոցիալական ցանցի իր էջում: Գրառումը հետևյալն էր. «Ես մի բան չեմ հասկանում՝ ուրեմն օրը ցերեկով առնվազն տասը մարդ եք սպանել, ապօրինաբար բանտարկել եք տարիներով, զրկել եք ունեցվածքից, տնից-տեղից, հարյուր հազարավորները թողել գնացել են պետությունից, ընկել են չոլերը՝ փախչելով Ձեր անպատիժ անարդարություններից, դեռ համարձակվում եք Ձեր մանկլավիկների միջոցով Ձեր հակամարդկային քաղաքականության, իշխանության դեմ դուրս եկածների հասցեին է՞լ հաչալ…
Լրի՞վ եք խելքներդ թռցրել, թե՞ մտածում եք՝ եթե ժողովուրդը համբերատար դեռ տանում է, այդպես էլ մնալու է, Դուք էլ Ձեր համար շարունակելու եք թալանել ու լափել…
Ձեր մանկլավիկ թղթակից, չգիտեմ ինչ սպասարկող բլոգեր է, խորհրդական է, փողով ստատուս գրող է, ինչ զահրումար է, հավաքեք ու ասեք ձայները կտրեն…
Թե՞ Ձեր համարձակությունը չի հերիքում, իրենց եք քսի տալիս հանրային դաշտ…
Կոռեկտության սահմաններն անցածները կոռեկտության կոչ են անում, խելքի աշեցեք…»,- գրել էր Սաքունցը:
Այս գրառման տակ Աշոտ Ավանեսյան անունով օգտատերը սպառնալիքներով գրառում է կատարել: «Սաքունց, ես քեզ սպանելու եմ. ադրբեջանամետ դիվերսանտ, բոզի տղա. դու Ալիևի ագենտն ես. քո նման վահանմարտիրոսյանների գլուխը կտրել է պետք. ամեն վայրկյան սպասիր ինձ. ես հետևից կրակողներից չեմ. կրակելու եմ դեմից, 2-3 մետրից, 9 մմ տրամաչափի փամփուշտով. սպասիր ինձ, Սաքունց»,- գրել է նա: Գրառմանն արձագանքել է Արթուր Ղազարյան անունով մեկ այլ օգտատեր, որը շարունակել է Ավանեսյանի գրառումը:
Իրավապաշտպան Արթուր Սաքունցը կասկածներ ունի, որ գրառումը թողած օգտատերերը կապ ունեն ոստիկանության հետ: «Ես չգիտեմ, թե նա ով է, բայց գրառումներից հասկանալի է, որ այդ երկուսը կապ ունեն իրար հետ, և ես կասկածներ ունեմ, որ նրանք կապ ունեն ոստիկանության հետ»,- մեզ հետ զրույցում ասաց Սաքունցը:
Իրավապաշտպանը սա գնահատում է որպես կոնկրետ իրավիճակի վերաբերյալ իր կարծիքի, գնահատականի, մարդու իրավունքների վիճակի վերաբերյալ իր կարծիքի հանդեպ ոտնձգություն և անմիջական սպառնալիք:

1in.am