Կառավարության վերջին նիստի ժամանակ, նախքան օրակարգային հարցերին անդրադառնալը, վարչապետ Կարեն Կարապետյանը դժգոհություն է հայտնել մարզերում և համայնքներում աղբահավաքության և սանիտարական մաքրման աշխատանքների որակից.

Վարչապետը հայտարարել է, որ վիճակը շատ վատ է՝ ուղղակի ողբերգական, այն աստիճանի, որ, օրինակ, Սևանա լճի շրջակայքում զբոսաշրջիկ տանելը ամոթ է. «Անհրաժեշտ է արձանագրել, որ մեծ մասամբ մարզպետերի, համայնքների ղեկավարների տարիների ընթացքում վատ աշխատանքի, թերացումների, իսկ շատ դեպքերում նաև իրենց պարտականությունների ուղղակի չկատարման արդյունքում ունենք այս վիճակը։ Վերջիններս պատասխանատու են ոչ միայն ընթացիկ աղբահավաքության ու սանիտարական մաքրման պատշաճ կազմակերպման համար, հատկապես ստեղծված վիճակը շտկելու, եղած աղբակույտերը, ցրված աղբը հավաքելու և տեղափոխելու, անկանոն շահագործվող աղբավայրերը փակելու համար։ Հետևաբար, այս բոլոր խնդիրների լուծումը պետք է ներառել մարզպետերի, համայնքների ղեկավարների հետ համատեղ մշակվող մարզային և համայնքային ծրագրերում»,- հայտարարել է Կարեն Կարապետյանը և ազդարարել «Մաքուր Հայաստան» ծրագրի մեկնարկը:

Նրա խոսքով՝ աղբանոցները զբաղեցնում են առավել քան 430 հեկտար տարածք: Առկա է դրանց պատշաճ հսկողության բացակայություն, քաղաքների և գյուղերի աղբահանման և մաքրման աշխատանքները թերի են, ճանապարհների և ճանապարհամերձ հատվածներում աղբի կուտակումներ կան և այլն։ Կարեն Կարապետյանը  հանձնարարել է ՀՀ արդարադատության նախարարին՝ 2-ամսյա ժամկետում քննարկել և կառավարության աշխատակազմ ներկայացնել համապատասխան օրենսդրական առաջարկություններ աղբահանության և սանիտարական մաքրման ոլորտում իրավախախտումների խիստ վարչական տույժեր նշանակելու վերաբերյալ:

Կարեն Կարապետյանը նաև հանձնարարել է ոստիկանության պետին 1-ամսյա ժամկետում ապահովել չսահմանված կամ չնախատեսված տեղերում ու վայրերում աղբ թափելու դեպքերը ճանապարհային ոստիկանության և պարեկապահակային ծառայության ուժերով կանխարգելումը, ՀՀ տարածքային կառավարման և զարգացման նախարարին՝ 1-ամսյա ժամկետում մարզպետերի, համայնքների ղեկավարների հետ համատեղ մշակվող մարզային և համայնքային ծրագրերում հստակ սահմանել աղբահանության և համայքներում սանիտարական մաքրման ոլորտին վերաբերող միջոցառումներ և դրանց կատարման նկատմամբ սահմանել խիստ հսկողություն:
Կառավարությոն նիստից մի քանի ժամ անց ոստիկանության կողմից տարածվեց հաղորդագրություն,   որտեղ խիստ զգուշացնում է, որ հետամուտ է լինելու Հայաստանում շրջակա միջավայրն աղտոտելու, աղբը չնախատեսված տեղերում լցնելու երեւույթի կանխմանը, հարկ եղած դեպքում օրենքով նախատեսված պատասխանատվության ենթարկելուն: Ոստիկանությունը կոչ է արել քաղաքացիներին նաև միանալ «Մաքուր Հայաստան» նախաձեռնությանը:

Ի դեպ, հատկանշական է, որ Կարեն Կարապետյանը աղբահանության վերաբերյալ իր հանձնարարականները անձամբ Վովա Գասպարյանին էր ուղղել, ով այսօր ներկա էր կառավարության նիստին: Շատ դեպքերում ոստիկանապետն անձամբ ներկա չի լինում նիստին, բայց այդ օրը գնացել էր: Նիստի ժամանակ ոստիկանապետի  և վարչապետի միջև խորհրդանշական երկխոսություն ծավալվեց.

«Պարո՛ն Գասպարյան, այսօր դեռ չունենալով տույժ-տուգանք, ուղղակի մեր ոստիկանության գործընկերներին խնդրում ենք մաքսիմալ կանխարգելման միջոցառումներ, ոնց պատկերացնում եք, բռնում եք, ասում եք՝ լսի, հավաքի գնա: Մենք 10 օր հետո ուրիշ ռեժիմ ենք ունենալու»:

Ոստիկանապետ Վլադիմիր Գասպարյանն արձագանքեց, թե չեն կարող այդպես անել: «Սակայն այստեղ ամենակարևոր խնդիրն այն է՝ որտեղ հիմա արդեն կեղտոտ ա, բոլորը միանգամից վերսկսվեն այդ աշխատանքները: Եթե պետք ա օժանդակել, բայց մաքրել ոստիկանին դժվար կլինի էն դեպքում, երբ բերում ա, մեքենայի թափքը բացում ա, աղբը թափում ա տռասայի վրա, մոտենա ասի՝ Դուք տուգանվում եք և այլն: Մենք ապարդյուն խոսակցություն ենք ստեղծում: Բայց մենք արդեն սկսում ենք»,- հայտարարեց Վլադիմիր Գասպարյանը:

Եվ ահա բառացիորեն մի քանի ժամվա ընթացքում Վովա Գասպարյանը ուղղակիորեն կատարեց վարչապետի հանձնարարականը: Հանձնարարականի օպերատիվությունը ուշագրավ է այն առումով, որ աղբահանությամբ վերահսկողությունը, որպես կանոն, երբևէ չի եղել և այսօր էլ չի համարվում ոստիկանության ուղղակի գործառույթը: Սա ավելի շատ տեղական ինքնակառավարման մարմինների հսկողության տիրույթում գտնվող գործառույթ է, նրանք  անգամ տուգանքներ կիրառելու ֆունկցիա ունեն: Բացի այդ,  նախկինում կային  խոսկցություններ,  որ ապօրինի խրոնիկ աղբավայրերը գոյանում են ոստիկանների գիտությամբ և համաձայնությամբ, հակառակ պարագայում բեռնատարով ճանապարհներին աղբ թափողները վաղուց բռնված կլինեին: