«Փաստինֆո»-ն արդեն անդրադարձել է ԱԺ պատգամավորության թեկնածու Նիկոլ Փաշինյանի ֆեյսբուքյան գրառմանը, որի համաձայն Հարավ-Արեւմտյան թաղամասում զինված հարձակում է տեղի ունեցել «Ելք» դաշինքի վստահված անձանց վրա:

Զինված հարձակում Մալաթիայում

Մեր խնդրանքով միջադեպի մասին իր մեկնաբանությունն է ներկայացրել փաստաբան, Արթուր Այվազյանի պաշտպան Հայկ Ալումյանը: Ստորև ներկայացնում ենք մեկնաբանությունն ամբողջությամբ:

«Գիշերվանից լուրեր են տարածվում այն մասին, թե իբրև Արթուր Այվազյանը՝ Մանախ մականունով, հարձակում է գործել «Ելք» դաշինքի քարոզչությունն իրականացնող մի շարք անձանց վրա:

Առայժմ կարող եմ ասել, որ իրականությունը բոլորովին այլ է: Երկրորդը, կոչ կանեի այս տեղեկատվությունը տարածող բարեխիղճ լրագրողներին հարգել Արթուր Այվազյանի անմեղության կանխավարկածը՝ հատկապես հաշվի առնելով, որ իրականում դեպքը տեղի է ունեցել բոլորովին ուրիշ ձևով. իրական տուժողը նշված դեպքից Արթուր Այվազյանն է, իսկ զենքը, որը ցուցադրվում է այժմ համացանցում, իրենը չի և իրենը չի եղել:

Նկատի ունենալով, որ վաղն ընտրություններ են, ես հիմա չեմ ուզում սրանից ավելի մանրամասներ ներկայացնել այդ դեպքի կապակցությամբ, որպեսզի ակամայից չվնասեմ «Ելք» դաշինքի վարկանիշին՝ հատկապես հաշվի առնելով, որ այդ դաշինքում կան իմ կողմից շատ հարգված մի շարք գործիչներ:

Բայց միաժամանակ կոչ եմ անում այդ դաշինքի ներկայացուցիչներին և հատկապես իմ կողմից հարգված պրն. Փաշինյանին չանել հրապարակային այնպիսի հայտարարություններ, որպիսիք կասկածի տակ կդնեն Արթուր Այվազյանի անմեղությունը»:

Ավելի վաղ Ոստիկանության լրատվական ծառայությունը հաղորդագրություն է տարածել՝ նախօրեին՝ ուշ երեկոյան, Մալաթիա վարչական շրջանում տեղի ունեցած միջադեպի առնչությամբ:

Բացահայտվել է Մալաթիա վարչական շրջանում տեղի ունեցած միջադեպը 

Դեպքի կապակցությամբ հարուցվել է քրեական գործ՝ ՀՀ քրեական օրենսգրքի 258-րդ հոդվածի 2-րդ մասի հատկանիշներով: Արթուր Ա.-ն ձերբակալված է:

 Աղբյուր` Փաստինֆո