Երեկ Արագածոտնի մարզի Աշնակ գյուղում գրանցվել է հերթական նախընտրական միջադեպը` ՀՀԿ համակիրների անմիջական մասնակցությամբ:

Aravot.am-ի տեղեկություններով, մարզի ճանապարհային ոստիկանության տարածքային բաժանմունքի նախկին պետի որդի Տավրոս Սափեյանը, որը ՀՀԿ թեկնածու Նաիրի Սահակյանի մտերիմն է, իր համախոհ մի խումբ երիտասարդների հետ, արդեն մի քանի օր է «զավթել» է գյուղամեջը:

Տեղացիներից մեկի ներկայացմամբ, ջահելները գինովցած վիճակում, գրեթե ամեն օր վերահսկում են գյուղի անցուդարձը` խոչընդոտելով քաղաքական բոլոր ուժերի և մարզից ռեյտինգային ընտրակարգով առաջադրված թեկնածուների քարոզարշավը գյուղում, բացի Արագածոտնի նախկին մարզպետ Սարգիս Սահակյանի եղբոր` Նաիրի Սահակյանի քարոզարշավից:

Տավրոս Սափեյանը նույնիսկ հայտարարել է. «Գյուղը նվիրում եմ Նաիրոյին»: Իսկ արդեն երեկ, Դաշնակցության քարոզարշավի ժամանակ «տավրոսականները», դարձյալ գինովցած, խոչընդոտել են Դաշնակցության մուտքը գյուղ, ինչի հետևանքով քաշքշուկ է տեղի ունեցել նրանց և գյուղացիների միջև, որոնք եկել էին մասնակցելու ՀՅԴ քարոզարշավին:

Նույն օրը, երեկոյան, նույն երիտասարդների խումբը տապալել է նաև «Ծառուկյան» դաշինքի ռեյտինգային թեկնածու Խաչիկ Մանուկյանի ընտրարշավը գյուղում և սպառնացել են, որ այդպես կլինի ցանկացածի դեպքում:

Մինչ վերջերս Աշնակը մշտապես համարվել է այլակարծության օրրան, որը հայտնի է իր հայկական ամուր ավանդույթներով և հայրենիքին տված հերոսներով: Մինչդեռ, ինչպես նշեց մեր զրուցակիցը, գյուղը այսօր դարձել է «Տավրոսիկի ու Նաիրիկի հոր դուքանը»:

Նելլի ԳՐԻԳՈՐՅԱՆ