Արթուր Սարգսյանի` «Հաց բերող»-ի դիահերձմանը, չնայած փաստաբանների պահանջին, ներկա չեն եղել միջազգային փորձագետներ, ինչն ըստ «Հիմնադիր խորհրդարան»-ի քարտուղարության անդամ Ալեք Ենիգոմշյանի՝ Սարգսյանի նկատմամբ տարվող լկտի քաղաքականության շարունակությունն է։

Հիշեցնենք, որ միջազգային անկախ փորձագետների ներգրավման ապահովուման համար Սարգսյանի իրավահաջորդի ներկայացուցիչները միջնորդել էին հետաձգել նրա դիահերձումը՝ նշելով, որ համապատասխան սառեցման ռեժիմ ապահովելու պայմաններում դին կարելի է պահպանել մինչեւ շաբաթ:

Սակայն երեկ դիահերձումն իրականացվել էր առանց փորձագետների։

Քննչական կոմիտեի նախագահի խորհրդական Սոնա Տռուզյանը տեղեկացրել է, որ Սարգսյանի փաստաբանների նախընտրած միջազգային փորձագետները դիահերձմանը չեն մասնակցել, քանի որ չեն ժամանել Հայաստան։

Տռուզյանը մեկնաբանել է, թե դիահերձումը հնարավոր չէր հետաձգել, քանի որ, ըստ մասնագետների, այն պետք է իրականացվեր մահվանից 12 ժամ հետո եւ ոչ ուշ, քան 48 ժամ անց, այլապես դա կարող էր բերել հյուսվածքների եւ բջիջների փոփոխությունների:

«Հիմնադիր խորհրդարան»-ի քարտուղարության անդամ Ալեք Ենիգոմշյանի կարծիքով, այն ամենն, ինչը հասցրեց Արթուրին ֆիզիկական մահվան եւ դրանից հետո կատարվողը նույն ստոր քաղաքականության շարունակությունն է։

«Այստեղ միայն դիահերձման խնդիրը չէ, ես չեմ պնդում, թե Արթուրին հիվանդանոցում են սպանել, Արթուրին սպանել են այն օրվանից, երբ իրեն հիվանդ վիճակում պահել են կալանքի ամենադաժան պայմաններում եւ իր առողջությունը խստորեն վատացել է։ Իսկ հիմա, երբ չսպասեցին, որ դիահերձմանը մասնակցեն միջազգային փորձագետները, լուրջ կասկածների տեղիք է տալիս եւ այդ լուրջ կասկածներն ունենալու իրավունքը բոլորս ունենք»,-Armtimes.com-ին ասում է Ենիգոմշյանը։

Հիշեցնենք, նաեւ, որ պահանջվում է Արթուր Սարգսյանին հուղարկավորել «Եռաբլուր» պանթեոնում։ Սակայն այս առիթով պաշտպանության նախարար Վիգեն Սարգսյանը հայտարարել է, թե «Եռաբլուրը» զինվորական պանթեոն է եւ այն չպետք է քաղաքականացվի։

Մինչդեռ նշվում է, որ Արթուր Սարգսյանը եղել է Արցախյան պատերազմի մասնակից։

«Հայաստանի պաշտպանույթան հետ սեփական կյանքով որեւէ կապ չունեցող մարդը՝ ներկայիս պաշտպանության նախարարը, կոչ է անում չքաղաքականացնել, սակայն հենց իրենք են քաղաքականացնում։ Արթուրը փաստացի եղել է Արցախյան ազատամարտի մասնակից եւ նա համապատասխանում է Եռաբլուրում ամփոփվելուն եւ որեւէ հիմք չկա այս պահանջը մերժելու։ Իշխանությունների այս քաղաքականությունը բազմապատկում է ժողովրդի ատելությունն իրենց նկատմամբ»,-ասում է Ալեք Ենիգոմշյանը։

Հիշեցնենք, որ «Սասնա ծռերին» օժանդակելու մեջ մեղադրվող 49-ամյա Արթուր Սարգսյանը՝ «Հաց բերողը», մարտի 16-ին մահացել էր «Արմենիա» բժշկական կենտրոնում՝  ըստ բժիշկների վարկածի՝ սիրտ-թոքային սուր անբավարարության հետեւանքով։ Սարգսյանը 2016 թվականի ամռանը ոստիկանության Երեւանի ՊՊԾ գնդի տարածքը գրավելու օրերին կրակահերթերի տակ ավտոմեքենայով ճեղքել էր ոստիկանական պատն ու սնունդ տարել «Սասնա ծռեր» զինված խմբին։ 

armtimes.com