Տարիներ շարունակ Միհրան Պողոսյանը վերահսկում էր Հայաստանում բանանի շուկան, և նրա «օգնությամբ» այս միրգը համարվում էր տարաշխարհիկ պտուղ, որը զարդարում էր միայն տոնական սեղանները կամ գնվում էր հատիկով և միայն երեխաների համար: Ի դեպ, այս մրգատեսակը մեր նախնիների ժառանգներն անվճար են վերցնում բնությունից. սա՝ ի գիտություն Միհրան Պողոսյանի:

Վերջին շրջանում վարչապետ Կարեն Կարապետյանը փորձում էր մենաշնորհների վերացման դիրքերն ամրապնդել, և դրանով իսկ բանանի դաշտում տեղի է ունենում իսկական խառնաշփոթ:

Նախ ՊԵԿ-ից անուղղակի լուրեր տարածվեցին, որ ինչ-որ գործարար, եթե իհարկե այդ գործարարը գոյություն ունի, ցանկացել է բանան ներկրել, և ՀՀ տարածքում խոչընդոտել են բանանի իրացմանը: Նա էլ, ինչպես վարչապետն էր հրահանգել, զանգել է ՊԵԿ, այնտեղ հարցը կարգավորել են: Կարճ ասած՝ Տնտեսական մրցակցության պաշտպանության պետական հանձնաժողովի հացն են կտրել:

Այնուհետև տեղեկություն տարածվեց, որ Սամվել Ալեքսանյանն է երկրորդ ներկրողը, և եթե դա այդպես էր, ապա ՊԵԿ-ի ինֆոն զուտ կատակերգության ժանրից էր: Իհարկե, պարոն Ալեքսանյանը հերքեց, որ երկրորդ ներկրողն է, ինչին ոչ ոք չհավատաց, քանի որ հայտարարում է, որ ինքը բիզնես չունի, և տիկին Շողիկն է իրեն պահում:

Եթե երկրորդ ներկրող կա շուկայում՝ դա ենթադրում է, որ բանանի գինը պետք է իջնի, սակայն, ինչպես հայտնի է, այն իջել է 20 դրամով: Անգամ ոչ տնտեսագետը կհասկանա, որ ոչ մի մրցակցություն էլ չկա, և բանանի շուկայում իսկական թատերական ներկայացում է, որտեղ բոլոր խաղացողների համար էլ բեմադրությունն իսկական գտածո է:

Նման հակասական լուրերի պայմաններում դժվար է գլուխ հանել, թե ի վերջո Միհրան Պողոսյանն է այլ ընկերության միջոցով բանան ներկրում. ինչպես հայտնի է, նա ոչ միայն հայաստանյան շուկան է մենաշնորհել, այլ, ըստ որոշ լուրերի, անգամ ՌԴ-ի մեծածախ շուկան: Եվ նա թույլ չէր տա ինչ-որ անհայտ գործարար մտներ բանանի տիրույթ:

Լավ, ինչո՞ւ է ՊԵԿ-ը փորձել մաս կազմել բանանի ներկայացմանը: Սա հիշեցնում է «Եռանկյունի» ֆիլմը, որտեղ Գասպարը պատմում է, որ փախուստի մեջ ոչ մի լավ բան չկա, և փորձել է գասպարավարի լողի միջոցով արդարացնել իր փախուստը Էրգրից: ՊԵԿ-ի այս գործելաոճը գասպարավարի լողի համատեքստում է:

Երևի կառավարությունում հասկացել են, որ իրենք կարող են գազի շուկան վերահսկել, իսկ ահա բանանի շուկան Միհրանը որևէ մեկին չի զիջի, ավելին՝ կարող է մամուլում այնպիսի խառնաշփոթ առաջացնել, որ շունը տիրոջը չճանաչի, ինչն էլ եղել է:

Կառավարությունը կա′մ պետք էր ընդուներ, որ անզոր է Միհրանի դեմ, կա′մ բեմադրության մաս կազմեր, և քանի որ վարչապետը չէր կարող իր թուլությունը հրապարակային ընդունել, ստիպված ընդունեց Միհրանի բանանային պարի հրավերը:

NEWSPRESS.am