Հայաստանցիներն այս տարի ամենաշատը գերադասում են Ամանորն անցկացնել Վրաստանում, Եգիպտոսում ու Արաբական Միացյալ Էմիրություններում: Այս մասին տեղեկացանք՝ հարցումներ կատարելով զբոսաշրջային գործակալություններում:
Էկզոտիկ երկրներից այս տարի հայաստանցիները գերադասում են Սեյշելյան կղզիները, Թաիլանդ մեկնողների թիվը նախորդ տարվա համեմատ նվազել է: Ինչ վերաբերում է եվրոպական երկրներին, ապա հիմնականում մարդիկ գերադասում են Ամանորն անցկացնել Իտալիայում և Իսպանիայում: Եթե նախորդ տարի Եգիպտոսը հետին պլան էր մղվել, այս տարի այնտեղ մեկնել ցանկացողների թիվը դարձյալ մեծ է:
«Հատկապես մեծ պահանջարկ ունեն Վրաստանը, Եգիպտոսն ու Էմիրությունները:
Մարդիկ մի քանի ընտանիքներով հարևան Վրաստան մեկնելու տուրփաթեթներ են պատվիրում: Դա մատչելի է, քանի որ վիզա չկա, ավիատոմսի վրա գումար չեն ծախսում: Եթե համադրենք որակն ու մատուցած ծառայությունները, գների առումով Եգիպտոսն ու Թբիլիսին մատչելի են: Էմիրությունները թեև մատչելի ուղղություն չէ, սակայն անմոռանալի տպավորություններով տոներ են մարդիկ այնտեղ անցկացնում»,- Lragir.am-ի հետ զրուցում ասաց «Շելբի տուր» ընկերության տնօրեն Մարինա Ավետիսյանը:
Նա միաժամանակ նկատում է, որ մարդկանց ֆինանսական վիճակն այս տարի մի փոքր վատացել է, հաճախորդների հարցումներից զգացվում է, որ մարդկանց կենսամակարդակը նվազել է: Ինչ վերաբերում է առաջարկվող ծառայությունների գնին, ապա մեր զրուցակիցն ասաց, որ նախորդ տարիների համեմատ գների բարձրացում չկա, ավելին, գների իջեցում կա՝ ի հաշիվ անորակ առաջարկների:
«Մեզ հարցնում են՝ ո՞նց կարող է պատահել, որ միաժամանակ 199 դոլարով և 370 հազար դրամով տուրփաթեթներ լինեն դեպի Թբիլիսի, մենք ասում ենք, որ դա բացատրվում է որակյալ տրանսպորտով, լավ հյուրանոցով ու սնունդով, լավ շոու ծրագրով: Այս ամենը կապ ունի գնի հետ: Եգիպտոսում միշտ խորհուրդ ենք տալիս ընտրել հինգ աստղանի հյուրանոց, որովհետև երեք և չորս աստղանի հյուրանոցներն այն որակը չեն ապահովում», ասաց Մարինա Ավետիսյանը:
Ինչ վերաբերում է հայաստանյան հանգստավայրերում Ամանորն անցկացնելու ցանկություն ունեցողներին, ընկերության տնօրենն ասաց, որ շատ հարցումներ չեն ստանում այս մասով, պահանջարկ չկա: Գուցե պատճառը հայաստանյան հյուրանոցների գներն են, որոնք հատկապես Ամանորին մեծ աճ են ունենում: Դրան զուգահեռ, մասնագետն ասում է, որ Վրաստանի համեմատ Հայաստանում սպասարկման որակը ցածր է:
«Ի՞նչ են առաջարկում թանկ գների դիմաց՝ չոր պատեր ու երկու կտոր ուտելիք: Այսինքն՝ արդարացված չէ այդ գինը: Եթե այդ գնի մեջ ներառված լինեին շատ ծառայություններ, գինն արդարացված կլիներ: Բայց 300-500 հազար դրամ մեկ անձի համար հայկական հանգստավայրերում վճարելը շատ թանկ է»,- ասաց նա:
Բացի այդ, մարդիկ գտնում են, որ հայաստանյան հանգստավայրերը մեկուսացված են, չկան ժամանցի վայրեր, հետաքրքիր շոու ծրագրեր, առևտրի կենտրոններ, որոնք տոնական օրերին ձգում են մարդկանց:
Եվ չնայած դրան, մեր հարցումները ցույց տվեցին, որ, օրինակ, Ծաղկաձորի հյուրանոցներում Ամանորի համար հիմնականում տեղերը զբաղեցված են, և մինչև հունվարի 7-ը տեղեր չկան:

lragir.am