Երևի խոսելու, հիշվելու պահանջ է ունեցել:

Եվ քանի որ օրվա թեման պաշտպանության նախկին նախարար Սեյրան Օհանյանի՝ ակտիվ քաղաքականությամբ զբաղվելու հայտն էր, Աշոտյանն այս առիթով ևս որոշել է ինքնատիպ երևալ ու արտահայտել է մի միտք, ինչը դժվար պիտի լինի միտք անվանել, քանի որ յուրաքանչյուր մտքի հիմքում իմաստն է ընկած, իսկ Աշոտյանի մտքի հիմքը կազմում է ակնհայտը մերժելու ջղաձիգ փափագը:

Ահա թե ինչ է ասել Արմեն Աշոտյանը. «Ունենալով հարգանք նախկին գեներալի անցած քաղաքական, ռազմական, մարդկային ճանապարհի հանդեպ, ունենալով ջերմ հարաբերություններ նրա հետ, այդուհանդերձ, պետք է նշել հայտնի ճշմարտությունը՝ «Պլատոնը իմ ընկերն է, բայց ճշմարտությունը ավելի թանկ է»։

 Իսկ Պլատոնի մտերմագույն ընկեր Աշոտյանի ասելիք ճշմարտությունն այն է, թե իբր քաղաքականությունը ձգում է նախկին պաշտոնյաներին, սակայն կյանքը ցույց է տալիս, որ նրանք չեն կարող արձանագրել մեծ արդյունքներ, բայց քաղաքական արևի տակ կարողանում են տեղ զբաղեցնել՝ ունենալով որոշակի ծրագիր, ամբիցիաներ։

Այլ կերպ ասած՝ Սեյրան Օհանյանը շանսեր չունի, քանի որ այլ զինվորականներ ևս անցել են նույն ուղին և ոչնչի չեն հասել:

Իր թեզը պաշտպանելու համար Աշոտյանը հիշեցրել է Վաղարշակ Հարությունյանին, Վազգեն Մանուկյանին, բայց շրջահայացորեն մոռացության է տվել Վազգեն Սարգսյանին, Ռոբերտ Քոչարյանին, Սերժ Սարգսյանին, Բակո Սահակյանին և բոլոր նրանց, որոնց կենսագրության մեջ մարտական ու ռազմական էջեր կան, սակայն քաղաքականության մեջ հաջողություններն ակնառու են եղել:

Մեկ ուրիշն Արմեն Աշոտյանի փոխարեն մի փոքր ազնիվ կգտնվեր ու պարզապես կասեր, որ Օհանյան Սեյրանի վերադարձն իր սրտով չէ, ու այդքանով հարցը կփակվեր:

Բայց Աշոտյանը խելոք տղա երևալու անբավարարվածություն ունի, նա չի կարող առանց զուգահեռների, խրթին դատողությունների, Պլատոնի ընկերակցության: Նա պիտի թեզեր մոգոնի հատուկ զինվորականների համար՝ գրողի ծոցն ուղարկելով համաշխարհային ողջ պատմությունը, միայն թե Օհանյանին դուրս մղի օրինաչափությունների դաշտից:

Ափսոս, որ ԿԳ նախկին նախարարը գոնե մեկ անգամ չի մտածել այն մասին, թե օրինաչափություններից որքան մեծ շեղում է մարմնավորում հենց ինքը, այնքան մեծ, որ այդ հարցում համակարծիք կլինեին թե՛ Պլատոնը, թե՛ Արիստոտելը:

shame.am