Օրերս հայտնի դարձավ, որ Հայաստանի Ազգային անվտանգության ծառայությունը «զրույցների» է հրավիրում տարբեր ակտիվիստների: Առաջինն այդ մասին հրապարակային հայտնեց կոմպոզիտոր Վահան Արծրունին, որին հաջորդեց քանդակագործ Հարություն Կարապետյանը:

Խոսել այն մասին, որ այդ զանգերն ապօրինի են, որ ԱԱԾ-ն ընդհանրապես իրավունք չունի նման գործառույթներ իրականացնել, ավելորդ է, քանի որ մեր ընթերցողին արդեն հայտնի է, թե որքանով է Հայաստանի անվտանգության այդ մարմինը հարգում Հայաստանի օրենսդրությունը:

Առաջիկայում մենք կանդրադառնանք նրան, որ ԱԱԾ-ն, փաստորեն, ապօրինաբար օգտագործում է քաղաքացիների անձնական տվյալներ հանդիսացող հեռախոսահամարներն ու այլ տվյալները: Սակայն այժմ քննարկենք ԱԱԾ-ականների՝ քաղաքացիների հետ շփվելու ոճը: Գաղտնիք չէ, որ ԱԱԾ-ն իրեն համարում է «ամենա-ամենա» ուժային կառույցը... Իրենք իրենց վեր են համարում ոչ միայն օրենքից, այլեւ, անգամ, տարրական կուլտուրայի ու բարոյականության նորմերից:

Այսպիսով, քանդակագործ Հարություն Կարապետյանի հետ հեռախոսազրույցի բռնված ԱԱԾ սպան քաղաքացու՝ գրավոր նամակ ուղարկելու օրինական պահանջին ի պատասխան ասել է. «Արա, ի՞նչ ես կապիկություն անում»: Եվ եթե փորձենք հարց տալ, թե ինչպես եղավ, որ մեր երկրում չեկիստը իրեն իրավունք վերապահեց մշակույթի գործչին նման կերպ դիմելու, ապա կհասկանանք, որ նման պահվածքը խրախուսվում է ամենաբարձր մակարդակով: ... Խոսքը Սերժ Սարգսյանի մասին է: 

Հիշեցնենք, որ 2014 թվականին ԱԱԾ մեկ այլ սպա՝ Վլադիմիր Հակոբյանը, փորձել էր սպառնալիքներով ու ճնշումներով ԱԱԾ հավաքագրել «Ժառանգություն» կուսակցության վարչության անդամ, լրագրող Հրայր Մանուկյանին, որը այդ ամենը ձայնագրեց եւ տարածեց համացանցով, ինչի արդյունքում Վլադ Հակոբյանին շատերը սկսեցին անվանել «վերբովշիկ Վլադ»...

Սակայն Վլադիմիր Հակոբյանը ոչ միայն չպատժվեց ապօրինի տեղեկությունների հավաքագրման, սպառնալիքների, կուսակցության գործունեության խոչընդոտման համար, այլ, հակառակը, ստացավ պաշտոնի բարձրացում եւ 2015 թվականին նշանակվեց նախագահի մամուլի խոսնակ:

Դե ինչ, Վլադիմիր Հակոբյանը իրոք լավ օրինակ է մյուս ԱԱԾ-ականների համար՝ պետք է սպառնալ, կոպտել ու այլ կերպ խախտել քաղաքացիների իրավունքները՝ խրախուսվելու համար... Եվ սա լավագույնս է նկարագրում Սերժ Սարգսյանի վերաբերմունքը քաղաքացիների նկատմամբ:

Հ.Գ. Համենայն դեպս, ավելորդ չէ նշել, որ իրավապաշտպանները ԱԱԾ-ի զանգերին ի պատասխան խորհուրդ են տալիս ընդհանրապես ոչինչ չխոսել, պահանջել գրավոր ծանուցում եւ դնել խոսափողը՝ դեպքի մասին բարձրաձայնելով լրատվամիջոցներով կամ գոնե սոցիալական ցանցերով:

Դանիել Իոաննիսյան

armtimes.com