Այն օրից ի վեր, ինչ ԿԳ նախարար, ՀՀԿ փոխնախագահ Արմեն Աշոտյանին ազատեցին աշխատանքից, նրա մոտ նկատելի է խիստ տարօրինակ վարք: Մի շարք բարդույթների առկայությամբ հանդերձ Աշոտյանն այդպես էլ չի կարողանում ինքնադրսևորվել այս նոր պայմաններում, և ցանկացած բան, ինչ նա ձեռնարկում է, պսակվում է անհաջողությամբ: Դա էլ իր հերթին բերում է որոշակի տրամադրություն և մտածողության փոփոխության:

Ահա հենց այդ փոփոխված մտածողության գոհարներն են, որ ժամանակ առ ժամանակ հայտնվում են նրա ֆեյսբուքյան էջում՝ երկար ու կարճ գրառումների տեսքով:

Այսօր էլ նա մի շարադրանք էր հրապարակել, որում առկա էին եղանակային փոփոխության հետևանքները, ինչպես նաև Աշոտյանի օրգանիզմում կալորիականության ավելցուկի հետքերը, ինչի մասին հեղինակն անձամբ էր խոստովանել:

Բայց ամենահետաքրքրականն այն է, որ Արմեն Աշոտյանը սկսել է արտահայտվել ալեգորիաներով: Ինչ-որ թափանցիկ ակնարկներ է անում, համեմատության եզրեր է որոնում և դրանց վրա կառուցում է իր դատողությունների ավազե տնակները:

Օրինակ, այսօր նա ընկել է ձյան տակ, հետո տուն է հասել, չորացել է, դառը սուրճ է խմել և բազմոցին նստած՝ որոշել է հեռուստացույց դիտել (հետաքրքիր է, ինչո՞ւ է Աշոտյանը կարծում, թե իր անձնական կյանքը, իր առօրյան պիտի հետաքրքիր լինեն Facebook-ի հանրույթին, որ մեծահոգաբար կիսվում է նրա հետ իր ինտիմակենցաղային դրվագներով, բայց սա այլ խոսակցության թեմա է, որին մեկ այլ առիթով կանդրադառնանք):

«Վերցնում ես «պուլտը» ու երբ փորձում ես փոխել ալիքները, երեխաներիդ խնդրող-պնդող-ծակող-կտրող հայացքներից հասկանում, որ ավելի լավ է չմտնել տեղեկատվական պատերազմի մեջ նոր սերնդի հետ ու լուռ հետևել, թե հերթական անիմաստ անիմացիոն զավեշտը երբ է ավարտվելու:Այդ պահին հասկանում ես, որ տղերքդ մեծացել են ու մասնակի իշխանափոխություն իրականացրել: Բազմոցի վրա քո սիրած տեղը դեռ քոնն է, բայց հեռուստացույցի «պուլտը»՝ արդեն չէ»,- գրում է նա:

Այն, որ Արմեն Աշոտյանն իրեն պարտված է զգում տեղեկատվական պատերազմում, դա նորություն չէ:

Վերջին հաշվով, նրա հրաժարականը պայմանավորված էր ոչ միայն վատ աշխատանքով, այլև ԶԼՄ-ների անխնա հակահարվածներով, որն ավարտվեց նախարարի կապիտուլյացիայով:

Բայց Աշոտյանը ընկճված է նաև նոր իրողության պայմաններում՝ ակնարկելով մասնակի իշխանափոխություն իրականացման մասին, որի արդյունքում ինքը կրկին երկրորդ պլանում է:

Իսկ ամենասարսափելին այն է, որ կառավարման վահանակն արդեն իր ձեռքերում չէ: Հիմա նա կառավարել չի կարող, հիմա առավելագույնը, ինչի մասին կարող է երազել, դա մի փոքրիկ տեղն է մեծ բազմոցի վրա, որտեղ դեռ կարելի է կուչ գալ, ծածկվել ծերունական ծածկոցով ու խմել իր կյանքի պես դառը սուրճը:

shame.am