Երեկ ՀՀԿ ԳՄ նիստ տեղի չունեցավ, հնարավոր է, այս շաբաթ ընդհանրապես նիստ չլինի: ՀՀԿ-ում սովորաբար ամեն հինգշաբթի ԳՄ նիստը չի լինում միայն այն դեպքում, երբ Ս. Սարգսյանը երկրում չի լինում, բայց այս շաբաթ նա երկրից դուրս չի եկել:

«Չի հրավիրել, քանի որ այս պահին դրա անհրաժեշտությունը չի առաջացել, վաղը եթե առաջանա, կհրավիրենք: Հաջորդ շաբաթ կունենանք»,- մեզ հետ զրույցում ասաց ՀՀԿ կազմակերպչական հանձնաժողովի նախագահ Ռուբիկ Թադեւոսյանը:

 Սպասվում էր, որ այս շաբաթ ՀՀԿ-ն պետք է հստակեցներ իր նախագահի տեղակալների թեկնածուների անունները, այնուհետեւ խորհրդի նիստում հաստատեր: Հայտնի է, որ առանձնացվել է առաջին տեղակալի պոստը, որի համար առաջադրվելու է վարչապետ Կարեն Կարապետյանի թեկնածությունը: Ներկայումս ՀՀԿ փոխնախագահներն են Արմեն Աշոտյանը, Գալուստ Սահակյանը, Մուշեղ Լալայանը, Հովիկ Աբրահամյանը եւ Ռազմիկ Զոհրաբյանը:

 Վերջինս չընդգրկվեց ԳՄ կազմ, միգուցե հրաժեշտ տա նաեւ տեղակալի պոստին: Հնարավո՞ր է, որ Սերժ Սարգսյանը ցանկանում է իր տեղակալների կազմում մեծ փոփոխություն անել, բայց դա դեռ չի հստակեցրել, այդ պատճառով էլ այս շաբաթ ԳՄ նիստ չի հրավիրել՝ մեր այս հարցին Ռուբիկ Թադեւոսյանը պատասխանեց. «Դուք ինչո՞ւ եք այդքան շտապում, ժամանակը կգա, խորհրդի նիստը կանենք, ձեզ էլ առաջինը կտեղեկացնենք»:

armtimes.com