Դատական ակտերի հարկադիր կատարման (ԴԱՀԿ) ծառայության նախկին ղեկավար Միհրան Պողոսյանի՝ Քեթրինի Միհրանի դժոխային օրերն արդեն անցյալում են: Միայն նրա պահվածքից արդեն կարելի է կռահել, որ վտանգը թիկունքում է, իրեն ներել են, Պանամայի օֆշորը մոռացվել է, և հիմա կարող է կրկին դրսևորվել ողջ շնչառությամբ:

Իսկ արդարադատության գեներալ-մայորին ուրիշ էլ ի՞նչ է անհրաժեշտ կորուստները հետ բերելու համար: Եվ քանի որ նոր պաշտոն դեռ չկա, Միհրան Պողոսյանն այս օրերին շատ հարմար տեղավորվել է մի դերի մեջ, որը վաղուց ի վեր փորձված տարբերակ է և գրեթե միշտ էլ էական արդյունքներ է արձանագրել: Քեթրինի Միհրանը դարձել է հայ մեծ բարեգործ:

Այսօր արդեն նրա ժպտերես լուսանկարը կարելի է հանդիպել տարբեր աղբյուրներում, իսկ մարդասիրական մեծ զոհաբերումների մասին հրապարակումները համացանցում տարածվում են ինչպես այդ նպատակի համար բացված առանձին էջերում, այնպես էլ գովազդային հավելվածներում: Օրինակ, ընդամենը մի քանի օր առաջ՝ Հաշմանդամների միջազգային օրվա առթիվ նա հաշմանդամ 1300 քաղաքացու օգնություն է տրամադրել: Հասկանալի է, որ միջոցները Քեթրինի Միհրանն իր քրտինքով չի վաստակել, այլ նույն այդ 1300 քաղաքացուց յուրացված միջոցների մի չնչին հատվածն է վերադարձնում նրանց: Բայց միևնույն է, տպավորություն գործում է:

Կամ, ասենք, ՀՀ Պատերազմի և զինված ուժերի վետերանների կոմիտեի կողմից՝ «Քեթրին» ՀԿ նախագահ, գեներալ-մայոր Միհրան Պողոսյանին պատվոգիր են հանձնում, և գիտե՞ք ինչի համար՝ հայրենասիրական դաստիարակության գործում ունեցած ակնառու ավանդի: Որ Պանամայում նա մարտնչել է հանուն հայրենիքի, դրանում ոչ մի կասկած չկա, որ ԴԱՀԿ-ում նրա ողջ գործունեությունից հայրենասիրություն էր թափվում, սա էլ կասկածից վեր է:

Հիմա Միհրան Պողոսյանին միայն մի բան է մնում՝ եկեղեցի կառուցել: Դա բոլոր մեծ բարեգործների առաքելության կարևոր բաղադրիչն է: Ու հենց կառուցեց, արդեն կարելի է Քեթրինի Միհրանին առանց վարանելու սրբերի կարգը դասել:

shame.am