Ոստիկանության նկատմամբ մեր հասարակության վերաբերմունքն առավել քան հայտնի է, այնպես որ հազիվ թե կարիք կա դրա մասին լսել Ազգային ժողովի փոխնախագահ Էդուարդ Շարմազանովից, առավել ևս, որ վերջինս չի կիսում մեծամասնության կարծիքը: Սա էլ է հասկանալի. Շարմազանովի եղբայրը, մի քանի ազգականներ ոստիկաններ են, պետք է պահպանել համազգեստի պատիվը: Սակայն պատիվը պաշտպանելու տարբեր եղանակներ կան, և Շարմազանովը ընտրել է դրանցից ամենաանհարմարը:

 Այսօր Ազգային ժողովում «Ոստիկանությունում ծառայություն անցնելու մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ նա հայտարարեց, որ դրական է գնահատում վերջին տարիներին ոստիկանության համակարգում կատարված փոփոխությունները, իսկ հետո հավելեց, թե՝ մենք պետք է փոխենք այն վատ վերաբերմունքը, որ կա որոշ մարգինալ շրջանակներում մեր ոստիկանության նկատմամբ:

Շարմազանովի դատողությունների ուղեծիրը պտույտներ է տալիս ժամանակի սլաքին հակառակ: Նա չի ասում, թե որտեղից է ծնունդ առնում այդ վատ վերաբերմունքը, բայց վրդովվում է նրանից, որ այն կա: Հետո ԱԺ փոխխոսնակն էլ ավելի հեռուն է գնում և բերում է բոլոր կարգի օրինակներից ամենաանհաջողը: «Երբ մեկի տուն գող է մտնում, երբ որևէ մեկն օգնության կարիք է ունենում, անմիջապես հիշում են ոստիկանությանը, սակայն երբ գալիս է ոստիկանի աշխատանքը գնահատելու պահը, բոլորը մոռանում են»:

Հավանաբար, Էդուարդ Շարմազանովը մոռացել է, որ ոստիկանության համակարգը գոյություն ունի այդ նույն քաղաքացիների միջոցների հաշվին և նրա միակ պարտականությունը նրանց շահերի ու իրավունքների պաշտպանությունն է: Իսկ ոստիկանների աշխատանքի գնահատումը ևս հասարակության լիարժեք իրավունքն է: Ու եթե այդ գնահատականը ցածր է, ապա միշտ և բոլոր դեպքերում մեղավորը ոչ թե քաղաքացիներն են լինելու, այլ ոստիկանությունը, քանի որ այդպես է իրերի հաջորդականությունը և ոչ երբեք՝ հակառակ կարգով:

Բայց եթե Շարմազանովի պատկերացումներն այլ են, կնշանակի գողության կամ դժվարությունների դեպքում նա օգնության չի կանչում ոստիկաններին, օգտվում է այլ կարգի ծառայություններից, որովհետև կարելի է համակարծիք չլինել, բայց գոնե ադեկվատ լինել անհրաժեշտ է:

Ի դեպ, ի գիտություն Շարմազանովի հիշեցնենք, որ վերջին ամիսներին ոտիկանության համակարգից նշանակալի հոսք է նկատվում, իսկ Ոստիկանության ակադեմիայում այս տարի դիմորդների թիվը խիստ պակասել է: Սրա մեղավորը դարձյա՞լ շարքային քաղաքացիներն են, թե՞ խնդիրը ներսից է գալիս:

shame.am