ԱԺ ՀՀԿ խմբակցության քարտուղար Գագիկ Մելիքյանը պատասխանելով լրագրողի այն հարցին,թե «Չե՞ք վիրավորվում իբրև հանրապետական»,որ Կարեն Կարապետյանը ՀՀԿ-ի մասին ասել է.«Ես նկատել եմ իրենց մեջ ցանկություն առաջին հերթին փոխելու և փոխվելու», պատասխանել է. «Կարծում եմ՝ հումոր է»:
Ընդհանրապես,հանրապետականների(հատկապես պաշտոնյա ) պատասխաններից դժվար է կռահել՝ նրանք հարցը հասկանու՞մ են,թե ոչ:
Այնպես չէ,որ ՀՀԿ-ում հավաքվել են բացառապես մտազուրկ մարդիկ,որոնք ընդունակ չեն ոչինչ հասկանալու:Հաստատապես չէ:Բայց մի բանում կարելի է հաստատապես համոզված լինել՝ ՀՀԿ-ում ոչ ոք,բացի Սերժ Սարգսյանից,իրավունք չունի արտահայտել սեփական կարծիք,այսինքն,ասել խոսք,միտք...,որը համաձայնեցված չէ Ս.Սարգսյանի հետ:
Գուցե այդպիսի գաղտնի հրահանգ կա:
Այն,որ վարչապետը ՀՀԿ-ի փոխվելու մասին հումոր է արել,կարծում եմ անկասկած է,իսկ թե ինչ է հասկացել և ինչ է փորձում բացատրել Գ.Մելիքյանը,դժվար է կռահել:
Հումորը հումոր,բայց երբ կարդում ես Գ.Մելիքյանի մյուս պատասխանները,սկսում ես որոշակիորեն կասկածել հրահանգի վերաբերյալ:
Լրագրողը Գ.Մելիքյանին հիշեցնում է վարչապետի մեկ այլ արտահայտությունը.«ՀՀԿ-ին անդամագրվելով իր վարկանիշն ընկել է» և ներկայացնում է տեսակետ,որ «հանրության մեջ ՀՀԿ-ի նկատմամբ հակակրանք և անտագոնիզմ կա»:
Այդ տեսակետներին ի պատասխան,Գ Մելիքյանը փոխանակ պատասխանելու՝ «Ես համաձայն չեմ ոչ մեկի տեսակետի հետ,բացի Ս.Սարգսյանի» և դրանով ապահովագրելով իր ապահով գոյությունը Ս.Սարգսյանի ողջ պաշտոնավորության ընթացքում,փորձում է լրագրողին և ընթերցողներին «համոզել» ,որ ՀՀԿ-ի նկատմամբ գոյություն չունի հակակրանք և անտագոնիզմ:
Նույնիսկ կարծիք է հայտնում,երևի գաղտնի հրահանգի էությունից բխող,որ իշխանությունների նկատմամբ միշտ եղել են և կլինեն քննադատություններ:
Այսինքն,ինչպես ԱՄՆ-ում քննադատում են դեմոկրատներին,Անգլիայում պահպանողականներին և մյուսներին,այնպես էլ մեզանում, քաղաքական մոդայի համաձայն քննադատում են էլի...
Առանց վիրավորելու,սույն պարոնին հիշեցնեմ,որ հարյուր հազարավոր հայերի սեփական երկրից ոչ ԱՄՆ-ի դեմոկրատներն են արտագաղթեցրել,ոչ Անգլիայի պահպանողականները,ոչ թուրքերը,ոչ էլ ազերիները...այլ միայն կոռուպցիայի մեջ թաղված,բյուջեն թալանող,ժողովրդին աղքատության եզրին հասցրած և միայն կեղծիքով վերարտադրվող ՀՀ իշխանությունները,իսկ ՀՀԿ-ն իշխանությունը է սկսած 1995թ.-ից:
ՀՀ պետականությունը թուլացնում և ժողովրդին արտագաղթեցնում է միմիայն անձնական և ոհմակային շահով առաջնորդվող հայ իշխանավորը,որոնց արժեհամակարգում հետևյալ արատներն են՝կեղծիք,տգիտություն,ստորաքարշություն,ագահություն...
Նրանց համար ազգային-պետական շահը ստորադասվում է անձնական շահից:Նրանք պատրաստ են ծառայել ցանկացած իշխանության,միայն թե պահպանվի իրենց անպատիժ գողանալու և անաշխատանք հարստանալու իրավունքը:
Նրանք նախկին կոմունիստներ են,ներկա հանրապետականներ,ապագա եդինոռուսներ կամ իլհամականներ:
Եվ նրանք իշխանության մարմիններում մեծամասնություն են:

Գագիկ Ղահրամանյան