Անտեղյակը կարող էր բացել Հայաստանի գրողների միության կայքը եւ այնտեղ կարդալ Անտոնինա Մահարուն վերաբերող տեղեկատվությունը:
,,Արձակագիր, ՀԳՄ անդամ 1997 թ.
Ծնվել է 1923 թ. դեկտեմբերի 29-ին, Վիլնյուսում (Լիտվա)։
Վիլնյուսի համալսարանի իրավաբանական ֆակուլտետի ուսանողուհի, անկախ Լիտվայի համար պայքարող ընդհատակյա կազմակերպության անդամ Անտոնինա Պավլիտայտեն, անցնելով ստալինյան բռնատիրության ճանապարհով՝ բանտ, աքսոր, հեռավոր Սիբիրում հանդիպում է հայ անվանի գրող Գուրգեն Մահարուն և դառնում նրա «պահապան հրեշտակը»։ Գ. Մահարու ցանկությամբ Անտոնինան գրում է նրա սիբիրյան ոդիսականի առաջին էջերը, որոնք տպագրվում են 1970 թ. Բեյրութում՝ Անդրանիկ Ծառուկյանի «Նաիրի» հանդեսում։ Նրա «Իմ ոդիսականը» գրքից պարբերաբար հատվածներ են տպագրվել «Լիտերատուրնայա Արմենիա» ամսագրում։

ԵՐԿԵՐ
1. Ժողովրդի ծառան, Եր., 2004։
2. Իմ ոդիսականը (ռուսերեն), 2003։
3. Իմ ոդիսականը (հայերեն), Բեյրութ, 1994,,։

Հիմա այդ անտեղյակը որպես ,,սկանդալային,, նյութ Ֆբ-ում գրառում է կատարում` նշելով, թե Մահարու այրին վատ վիճակում է ապրում, հիվանդ է եւ այլն:
Դրա համար պատասխանատու է նախ` Հայաստանի գրողների միությունը, որը ֆոնդ ունի, որտեղ քիչ փողեր չեն հավաքվել ու հիմա էլ կան:
Ինչու 1997-ից ի վեր այդ ֆոնդի միջոցով ՀԳՄ-ն չի աջակցել գրողի կնոջը:
Ինչու Սոցապնախարարությունը չի փորձել հասկանալ գրողի կնոջ` անելանելի վիճակում հայտնվելու հանգամանքները եւ հավելյալ օժանակություն չի ցուցաբերել: Թե?, նախարար Արտեմ Ասատարյանն ասածն ասել ու պրծել է` ,,2016-ին դժվարանալու է մեր կյանքը.,,: Ինչու առողջապահության նախարարությունը հիվանդի կացությանը համարժեքորեն չի արձագանքել: Նրանց բոլորին պետք է տեղեկացներ ՀԳՄ-ն:

Ի դեպ, ՀՀ մշակույթի նախարարությունը սոցապնախարարություն չէ եւ այն, ինչ արել է Գուրգեն Մահարու գործերի հրատարակության կամ վերահրատարակության գործում` արել է, եւ դա իր պարտքն ու պատասխանատվությունն է /այնպես չէ, որ թերացել է, արել է նույնիսկ ավելին: Ես ձեռք եմ բերել վերջին տարիներին հրատարակված Մահարու գրքերը եւ նրա մասին հրատարակությունները/: Չեմ ասում մշակույթի նախարարությունը աչքիս լույսն է, բայց փաստն այն է, որ իր չափով եւ իր իրավասությունների շրջանակներում իր գործն արել է:
Անտոնինա Մահարու ծանր դրության թիվ մեկ պատասխանատուն նախ` ՀԳՄ-ն է, հետո` Սոցապնախարրությունը, կամ` հակառակը:
Բայց այս ամենն էլ դեռ մի կողմ:
Անտոնինայի դրության մասին շուխուր անող լրատվամիջոցները նախ թող բարի լինեին, պարզեին ու գրեին, որ ,,Մեր գոտիները պետք է ձգենք,,-ի մասին հայտարարող եւ նման խոստում տված վարչապետը 2016-ի բյուջեում նախատեսել է շուրջ 3 միլիարդ ծախսել /մոտ 7 միլիոն դոլար/ օրենսդիր, գործադիր եւ դատական իշխանությունների պարգեւատրումների,խրախուսումների եւ հատուկ վճարների համար:


Կիմա Եղիազարյան