Մինչ հանրության կողմից անվստահություն արտահայտող կոչեր են հնչում կառավարության նոր որոշման վերաբերյալ, որն առնչվում է զոհված կամ հաշմանդամ դարձած զինծառայողների ընտանիքներին աջակցելու նպատակով քաղաքացիների աշխատավարձերից ամսական 1.000 դրամ գանձելուն, մարդկանց զայրույթը կրկնապատկելու հնարավորությունը ձեռքից բաց չի թողել ՀՀԿ-ական պատգամավոր Գագիկ Մելիքյանը:
Անդրադառնալով համացանցում տեղ գտած հազարավոր գրառումների բովանդակությանը՝ Մելիքյանն ասել է. «Պետք չէ մի քանի տականքների անունից գրված նման գրառումներին պատասխան տալ»:
«Տականքներն» իրականում մի քանիսը չէին, այլ մի ամբողջ ժողովուրդ, և նրանք, իրոք, մի մեծ մեղք գործել էին՝ հանդուրժելով Գագիկ Մելիքյանի ֆիզիկական գոյությունն իրենց միջավայրում:
Բայց այս Մելիքյանը մեկ ուրիշ միջավայր էլ ունի՝ միայն իրեն հայտնի, ու պնդում է, թե «հասարակության կողմից շատ լավ է ընկալվել կառավարության ներկայացրած նախագիծը», բայց չի բացատրել, որ եթե այդքան լավ է ընկալվել, այդ դեպքում ինքը, պաշտպանության նախարարը, երիտՀՀԿ-ականները ինչո՞ւ են շարունակում՝ քրտինք մտած, համոզել մի հասարակության, որն արդեն ջերմորեն ընդունել է իրենց ասածը:
Իսկ իրականում Գագիկ Մելիքյանին կարելի է դասել այն արարածների շարքին, ովքեր թքած ունեն հասարակական կարծիքի վրա:
Ընդամենը շաբաթներ առաջ նա նույն քամահրանքով վարչապետ Կարեն Կարապետյանին հորդորում էր «բանի տեղ չդնել» կառավարության ծրագրի դեմ արտահայտվողների ելույթները՝ ասելով. «կանցնի, կգնա», որովհետև կողմնակի կարծիքները տեղ չունեն այն միջավայրում, որտեղ իշխում է մեկ կարծիքի գերիշխանությունը:
Այդ միջավայրում այլ դիրքորոշում ունեցողին անվանում են տականք, իսկ հնազանդ ստրուկը կոչվում է Գագիկ Մելիքյան: