Արդեն պարզ է, որ մշակույթի նորանշանակ նախարար Արմեն Ամիրյանն այնքան էլ լավ չի տիրապետում իրավիճակին և քիչ պատկերացումներ ունի կառույցի ներսում ձևավորված հարաբերությունների իրական արմատների մասին:

Սրա արդյունքն է, որ նա սկսել է մեծ-մեծ խոստումներ տալ՝ բնավ չգիտակցելով, թե ինչ խոչընդոտների է հանդիպելու և ինչպես է հաղթահարելու դրանք: Եվ ահա Ամիրյանի համար ևս մի փորձություն է դարձել, այսպես կոչված, թաղումների հարցը:

 Ինչպես հայտնի է, արդեն երկու տարի մշակույթի նախարարությունը հուղարկավորության արարողությունների կազմակերպման գործը հանձնարարում է ոչ թե իրեն ենթակա ՊՈԱԿ-ին՝ պետական ֆիլհարմոնիային, այլ ՀՀ ԱԺ պատգամավոր Մհեր Սեդրակյանին պատկանող «Ալեքս Մանչ» ՍՊԸ-ին: Սրա առիթով մի քանի հրապարակումներ եղան, այլ կերպ ասած՝ պահանջվեց բացատրություն այն մասին, թե ինչ հիմունքներով է Թոխմախի Մհերն արժանացել այդ արտոնությանը, եթե դա նախարարության գործառույթն էր: Եվ անփորձ Արմեն Ամիրյանն էլ լոպազ-լոպազ հարցը կարգավորելու պատասխանատվություն ստանձնեց:

 Շատ հետաքրքիր պիտի լինի հետևել Ամիրյան - Թոխմախի Մհեր գոտեմարտին: Սա նաև հնարավորություն կտա հասկանալ, թե նոր նախարարի սուրը որտեղ է կտրում, իսկ որտեղ պարզապես փշուր-փշուր է լինում:

Մհեր Սեդրակյանն էլ իր հերթին ապացուցելու բաներ ունի: Նա պիտի ցուցադրի, որ իր հզորության սահմաններն ավելին են, քան ինչ-որ մի Ամիրյան, որը եկել ու պատրատվում է բիզնեսը զրկել հավելյալ եկամուտներից:

Եվ քանի որ կռվում հաղթողը միայն մեկն է լինում, մարդիկ հիմա սպասում են, թե երկուսից որ մեկը մյուսին կթաղի:

Թաղման գործը կանգ չի առնելու:

shame.am