Գյումրիի քաղաքապետ Սամվել Բալասանյանի բախտը մազից է կախված: ՏԻՄ ընտրությունների արդյունքներով ստացվել է այնպես, որ «Բալասանյան» դաշինքը ստացել է 15 մանդատ, 9 մանդատ բաժին է հասել ԲՀԿ-ին, 5 մանդատ՝ ՀՎԿ-ին, 4 մանդատ՝ ԳԱԼԱ-ին։ Այսինքն, եթե ընդդիմության 3 ուժերը միավորվեն իրենց 18 մանդատներով, «Բալասանյան դաշինքը» վշտանալու առիթ կունենա:

Բայց արի ու տես, որ սա այնքան էլ հեշտ բան չէ: Այսինքն, հեշտ բան չէ օրենքի հետ գործ ունենալը, որովհետև օրենքը հենց նրա համար է, որ մի դեպքում թվերն ավելին լինեն, մեկ այլ դեպքում՝ պակաս: Մի քանի հայտնի ՀՀԿ-ականներ (Աշոտյան, Ֆարմանյան և այլն) արդեն երեկ, ԿԸՀ-ից էլ առաջ ընկնելով, իրենց ֆեյսբուքյան էջերում սկսեցին բացատրել, թե ընդդիմությունը սխալ է հաշվել և քաղաքապետ է դառնալու Բալասանյանը։

Ո՞րն էր սխալ հաշվարկի էությունը: Փոքր-ինչ ուշացմամբ օգնության հասավ Կենտրոնական ընտրական հանձնաժողովի նախագահ Տիգրան Մուկուչյանը և անմիջապես բացատրեց, որ «Բալասանյան դաշինքը» ստացել է քաղաքի ներկայացուցչական մարմնի մանդատների ավելի քան 40%-ը: Եվ այս դեպքում, ՀՀ Ընտրական օրենսգրքի 141 հոդվածի 5-րդ կետի համաձայն, այսպես կոչված, բոնուսի հաշվին դաշինքին 17 մանդատ է տրվում՝ բացարձակ մեծամասնություն: Իսկ սա իր հերթին նշանակում է, որ ընդդիմադիրներից կվերցվի 2 մանդատ՝ ճիշտ այնքան, որքան անհրաժեշտ է Բալասանյանին քաղաքապետ դառնալու համար:

Այս իմաստով մեր Ընտրական օրենսգիրքն իսկապես հրաշքներ կարող է գործել, որովհետև միայն մերը կարող է 32% ստացած քաղաքական ուժին շնորհել 51 տոկոսի մանդատ՝ դա համարելով միանգամայն օրինական ու արդար: Եվ միայն մեր օրենսգիրքը կարող է կազմակերպել փրկչական նմանատիպ օպերացիաներ՝ խորտակումից ազատելով տոկոսների բեռան տակ մնաված Բալասանյաններին և մյուսներին:

shame.am