«Արդարություն Հայաստանում»` ահա այս վերնագրով ստորագրահավաք են կազմակերպել սփյուռքահայ հարգարժան մի շարք գործիչներ, որոնք թեև տաղանդավոր ու հարգարժան մարդիկ են և քիչ բան չեն արել Հայաստանի համար, բայց Հայաստանում լինում են լավագույն դեպքում 2 տարին մեկ մի քանի օրով և տուրիստի կարգավիճակով: Եվ թվում է, թե արդարությունն ամբողջ աշխարհում հաստատված է, միայն Հայաստանն է դուրս մնացել գործընթացից...

Օրինակ փորձում եմ հիշել, թե երբ որ ԱՄՆ-ում ոստիկանը քաղաքային զբոսայգում գնդակահարեց 12-ամյա սևամորթ երեխային խաղալիք ատրճանակով խաղալու համար, այդ և նմանատիպ տասնյակ այլ դեպքերի ժամանակ ԱՄՆ-ի քաղաքացի հանդիսացող և իմ կողմից շատ սիրելի ու տաղանդավոր երաժիշտ Սերժ Թանկյանը հանդես եկա՞վ «Արդարություն ԱՄՆ-ում» նախաձեռնությամբ, կամ երբ ԱՄՆ-ի զորքերը ավերակի վերածեցին Սիրիայի բնակավայրերը, հանդես եկա՞վ ԱՄՆ իշխանությունների հասցեին քննադատություններով, թե՞ դա միայն Հայաստանի դեպքում է հնարավոր:

Կամ մի՞թե Կանադայում երբևէ անարդարություններ չեն լինում, որ Կանադայի քաղաքացիներ հանդիսացող Ատոմ Էգոյանն ու Արսինե Խանջյանը սևեռվել են Հայաստանի անարդարությունների վրա և ուզում են 2017-ի խորհրդարանական ընտրությունների օրը ներկա լինել այստեղ: Բայց, օրինակ, ինչու՞ միայն ընտրությունների օրը, ինչու՞ նույն հարգարժան Ատոմ Էգոյանն ու Արսինե Խանջյանը չեն կարող Հայաստան գալ ոչ թե հաշված օրերով, այլ ասենք մի քանի ամիս այստեղ բնակվելու և արդեն որպես բնակիչ անարդարությունների դեմ պայքարելու նպատակով: Թե՞ հայրենիքում որոշ ժամանակ բնակվելու թեման սարսափեցնում է հարգարժան հայրենասերներին: Նրանք իրենց հայտարարության մեջ «ոչ» են ասում նաև Հայաստանում «ազգային բնակչության կրճատմանը»` առանց նշելու, որ հենց իրենք և իրենց նման բազմաթիվ մեր հայրենակիցներն են այդ կրճատողները, որոնք օտար երկրները գերադասում են հայրենիքից, օրատերկրյա անձնագրերը` ՀՀ անձնագրից:

Նույն ստորագրահավաքին արդեն շտապել են միանալ ՀՀ նախկին արտգործնախարարներ Վարդան Օսկանյանն ու Րաֆֆի Հովհաննիսյանը. երևի թե նրանք էլ արդարության պակաս ունեն: Վարդան Օսկանյանը երևի գտնում է, թե արդար չէ, որ իր որդու ավտոմեքենան «Շանգրիլա» խաղատան մոտից տեղափոխում են տուգանային հրապարակ, որ օրինակ ԱՄՆ-ում իր որդին խաղատներ չէր հաճախի և իր` իշխանության տարիներին դիզած փողերով հիմնված բիզնեսներից ստացած գումարները չէր վատնի այնտեղ:

Րաֆֆի Հովհաննիսյանն էլ երևի թե գտնում է, թե արդար չէ, որ ժամանակին ինքն ուներ կես միլիոն համակիր, իսկ այսօր մնացել են ինքն ու Զարուհի Փոստանջյանը, արդար չէ, որ մարդիկ չհավատացին իր տարօրինակ հացադուլներին, իր կասկածելի «պայքարին» և աստիճանաբար դադարեցին իր համակիրը լինելուց: Հավանաբար արդար չէ նաև, որ ինքը ԱՄՆ-ում դրամահավաքներ է իրականացնում իբրև թե Հայաստանում հեղափոխություն անելու համար և այդ հեղափոխությունն այդպես էլ ոչ ոք չի տեսնում: Անշուշտ, անարդար է...

Իսկ անարդար բաներ մեր երկրում իսկապես կան, բայց այդ անարդարությունների դեմ պայքարելու համար իմ կարծիքով արժե առնվազն տարեկան գոնե 10 օրից ավելի ապրել Հայաստանում: Վերջապես անարդարությունների դեմ պայքարելու ավելի արդյունավետ տարբերակներ կան, որոնցից մի քանիսը հուշեմ մեր սփյուռքահայ արդարամիտ բարեկամների համար.

- Դուք կարող եք գալ բնակվել Հայաստանում, ձեր երեխային տանել դպրոց, դպրոցում նկատել օրինակ ապօրինի դրամահավաքի դեպք և տեղում բարձրաձայնելով հարցը` կանխել այն և նպաստել արդարության հաստատմանը: 

- Դուք կարող եք գալ բնակվել Հայաստանում, սկսել բիզնես գործունեություն և նկատելով օրինակ հարկային տեսուչի կողմից իր լիազորություններն անցնելու և կոռուպցիոն գործարք առաջարկելու երևույթ` կանխել այն, բարձրաձայնել այդ մասին և պատժել տալ օրինազանց տեսուչին:

- Դուք կարող եք գալ բնակվել Հայաստանում, առողջական խնդիրներ ունենալու ժամանակ այցելել Հայաստանի առողջապահական հաստատություններ և նկատելով այնտեղ կոռուպցիոն երևույթներ` բարձրաձայնել այդ մասին ու դրանով կանխել այդ երևույթները և նպաստել արադարության հաստատմանը:

- Դուք կարող եք գալ բնակվել Հայաստանում և ունենալ խնդիրներ իրավական համակարգի հետ կապված ու համապատասխան ընթացակարգով բարձրաձայնել, բողոքել կաշառք վերցնող դատավորի, փաստաբանի կամ ոստիկանի դեմ և պատժել տալ օրինազանցներին:

Դուք կարող եք շատ ու շատ այլ բաներ էլ անել, մասնակցել ՀՀ ներքաղաքական կյանքին, բայց Հայաստանում, հայրենիքում բնակվելով ու դրա լիիրավ իրավունքը ունենալով, որովհետև իմ խորին համոզմամբ`ՀՀ ներքաղաքական գործընթացները բացառապես ՀՀ քաղաքացիներին են վերաբերվում ու ազգությամբ հայ, բայց այլ երկրի քաղաքացի լինելը դեռ իրավունք չի տալիս խառնվել ձեր համար այլ պետություն հանդիսացող Հայաստանի ներքին գործերի մեջ: Իսկ եթե այդքան մտահոգ եք՝առաջարկում եմ, որ հրաժարվեք ձեր քաղաքացիությունից, տեղափոխվեք Հայաստան, ապրեք այստեղ և մեզ հետ միասին մասնակցեք Հայաստանի քաղաքական կյանքին:

Կարեն Վարդանյան

ՀայՄեդիա.AM-ի գլխավոր խմբագիր