Անկախության 25-ամյակին նվիրված ռազմական շքերթի տպավորությունը կարող էր միայն դրական հույզեր արթնացնել, եթե դրան չհաջորդեին մի շարք հիասթափեցնող կասկածներ ու հայտարարություններ: Սկզբում խոոսքը գնում էր մեծ աղմուկ հանած «Իսկանդեր» համակարգերի մասին: Ոմանք սկսեցին պնդել, թե դրանք Հայաստանին չեն պատկանում: Եվ այդ հայտարարություններին ի պատասխան հերքումով հանդես եկավ ՀՀ ՊՆ մամուլի քարտուղար Արծրուն Հովհաննիսյանը ով բառացիորեն հետևյալն ասաց. «Հայաստանի Հանրապետության անկախության պատմության ընթացքում եղած զորահանդեսների ժամանակ ցուցադրվել են միայն ու միայն Հայկական Զինված ուժերի կազմում եղած սպառազինությունները»:

«Միայն ու միայն» բառերի տպավորությունը ներգործեց:Վիճաբանությունները մարեցին ու ամեն ինչ հարթ կընթանար, եթե չկատարվեր հերթական անակնկալը:

Մի ռուս օդաչու համացանցում տեղադրեց երևանյան շքերթի ժամանակ իր թռիչքի նկարահանումը ու անմիջապես ակնհայտ դարձավ, որ զորահանդեսում ներկայացված օդուժը մերը չի եղել, ու Արծրուն Հովհաննիսյանի «միայն ու միայնը» ոչ մի արժեք չունի:

Այս տհաճ բացահայտումից անմիջապես հետո նույն Արծրուն Հովհաննիսյանին ուրիշ ոչինչ չէր մնում, քան խոստովանել, որ ռազմական շքերթի ժամանակ ՄԻԳ-29 կործանիչներով օդաչուները ռուսական 102-րդ ռազմաբազայի զինծառայողներն են: «ՄԻԳ 29 կործանիչները ռուսական ռազմաբազայինն են»,- հաստատեց նա:

Հարցին, թե ինչու են ռուսական ռազմաբազայի զինծառայողները «Բուրգ» մարտական շարքով սլացել երկնքում, Հովհաննիսյանն ասաց, որ վերջիններս իրենց ծառայությունն են կատարել, և այդտեղ որևէ արտառոց բան չկա:

Հովհաննիսյանը երևի չի հասկանում արտառոց բառի իմաստը, այլապես կխուսափեր այն օգտագործել: Մի՞թե կարող է դրանից ավելի արտառոց բան էլ լինի:

Ամենաարտառոցը մնում էր այն, որ զորահանդեսին պաշտպանության նախարարն էլ մերը չլիներ: Իսկ որտե՞ղ է մեր օդուժը, ո՞ւր են մեր օդաչուներն ու ինքնաթիռները: Ռուսները կթռչեին միայն այն դեպքում, եթե հայկական կողմը կամ ընդհանրապես օդուժ չունենար, կամ մեր օդաչուների վարպետությունն այնքան ցածր լիներ, որ նույնիսկ մի քանի վայրկյան Երևանի երկնքով համաչափ թռիչք կատարելու պատրաստ չլինեին: Հովհաննիսյանը սա էլ է հաստատո՞ւմ:

Իսկ ընդհանրապես ռազմական շքերթների ժամանակ յուրաքանչյուր երկիր ցուցադրում է իր ունեցածը: Իր սեփականը, ոչ թե ուրիշինը: Այլապես ո՞րն է դրա իմաստը: Նույն հաջողությամբ կարելի էր սեպտեմբերի 21-ի առիթով որևէ միջուկային երկրից մեկ-երկու ժամով ատոմային ռումբ խնդրել անցկացնել Հանրապետության հրապարակով ու հետո բոլորին հպարտությամբ հարցնել. «Տեսա՞ք, թե ինչ անցավ»:

shame.am