Տաշիր Սամո՞ն է ձևավորում կառավարությունը
Կառավարության կազմի փոփոխություններին զուգընթաց շրջանառության մեջ դրվեց մի տեղեկություն, համաձայն որի բարեփոխումների դեպքում հայտնի գործարար Սամվել Կարապետյանը խոստացել է Հայաստանում խոշոր ներդրումներ կատարել: Խոսում էին մինչև 5 միլիարդ դոլարի հասնող հատկացումների մասին: Ճշմարտություն է սա, թե ընդամենը բարի ցանկություն, դեռևս հստակ չէ: Փոխարենն այս օրերին նույն Սամվել Կարապետյանի անունը ավելի ու ավելի հաճախ է հիշատակվում, ընդ որում, բոլորովին ոչ նրա գործունեության ոլորտին առնչվող թեմաների դեպքում: Եթե վստահելու լինենք այդ լուրերին, ապա կարող է տպավորություն ստեղծվել, թե Տաշիր Սամոն ուղղակիորեն միջամտում է նոր կառավարության ձևավորման գործընթացին:
Օրինակ, այսօր գրվեց այն մասին, որ վարչապետ Կարեն Կարապետյանն այսօր Տրանսպորտի և կապի նախարարության աշխատակազմերին էր ներկայացնում նորանշանակ նախարարին, իսկ Գագիկ Բեգլարյանը ներկա չի եղել հանդիպմանը: Եվ անմիջապես լրատվամիջոցները հայտնեցին, որ Բեգլարյանի ու Կարեն Կարապետյանի հարաբերությունները լարվել են նրա չվերանշանակվելուց հետո: Ըստ լուրերի` Գագիկ Բեգլարյանի որդու` սեպտեմբերի 17-ին տեղի ունեցած հարսանիքին ներկա է եղել նաև նորանշանակ վարչապետը, ու նրանք բավականին ջերմ շփվել են: Ամեն ինչ փչացել է սեպտեմբերի 20-ից հետո. ռուսաստանաբնակ գործարար Սամվել Կարապետյանը չի միջնորդել Բեգլարյանի վերանշանակման հարցում:
Ստացվում է, որ Կարապետյան Սամվելը գլխավոր միջնորդի դերն է ստանձնել: Գրեթե նմանատիպ մի տեղեկություն էլ առնչվում էր Սփյուռքի նախարար Հրանուշ Հակոբյանին: Բնական է, որ այս տիկինը նույնպես ցանկանում է պահպանել իր պաշտոնը: Եվ հիմա խոսում են այն մասին, որ Հակոբյանը նախարարի իր պաշտոնը փորձում է պահպանել Սամվել ու Կարեն Կարապետյան եղբայրների միջոցով: Ինչպես հայտնի է, Հրանուշ Հակոբյանը և Կարապետյանները խնամիական կապ ունեն, իսկ Կարապետյանները լավ հարաբերություններ ունեն նորանշանակ վարչապետ Կարեն Կարապետյանի հետ, որը Սամվել Կարապետյանի քավորն է, իսկ վարչապետը թե Ռուսաստանում, թե Հայաստանում վայելում Է երկու եղբայրների աջակցությունը։ Նույնիսկ պնդումներ հնչեցին այն մասին, որ Հրանուշ Հակոբյանը հենց նույն Կարապետյան եղբայրների շնորհիվ է ստացել նախարարի պաշտոնը։
Այս կարգի լուրերի առատությունը անուղղակիորեն հարվածում է նոր վարչապետի հեղինակությանը: Ինչ-որ մեկին խիստ անհրաժեշտ է, որ պատկերը հենց այդպես ներկայացվի: Մնում է հուսալ, որ Կարապետյան Կարենն իր գործողություններով հակառակը կհաստատի: Այլապես Կարապետյան Սամվելը կվերածվի Հայաստանի դե ֆակտո վարչապետի:

shame.am