Հայաստանյան ընդդիմությունն իր առջև լուրջ խնդիր է դրել՝ մինչև տարեվերջ հստակեցնել, թե նրանցից որ մեկն է վաստակելու «Հայաստանի վաստակավոր ընդդիմադիր» կոչումը, կարծես այդ պատվին արժանանալուց անմիջապես հետո երկրի ամբողջ բնակչությունը կանգնելու է այդ քաղաքական ուժի թիկունքին: Իսկ նման մրցակցության պայմաններում այլևս խոսք լինել չի կարող միավորվելու, մեկ ճակատով հանդես գալու մասին, որքան էլ որ ժամանակ առ ժամանակ մի շարք իդեալիստներ և ուտոպիստներ ակնարկեն այդ մասին:

 Սակայն ընդդիմության բանակում ծավալվող թեժ մարտերի առանձնահատկությունն այս անգամ այն է, որ իշխանությունները բացարձակ մասնակցություն չեն ցուցաբերում դրանց, թեև պիտի սպասվեր, որ գլխավոր պայքարն ընթանալու է իշխանության և ընդդիմության միջև, ինչպես լինում է բոլոր նորմալ երկրներում և ներքաղաքական հարաբերություններում: Իսկ մեզ մոտ պարզվեց, որ վերևները դրա կարիքը բոլորովին չունեն, քանի որ մրցակցի դաշտում շատ լավ էլ իրար միս են ծամում, ու դեռ հայտնի չէ, թե այդ «ճաշկերույթից» ով դուրս կգա ողջ ու կշտացած:

Ահա, օրինակ, այսօր գլխավոր ընդդիմադրի հավակնորդ՝ «Քաղաքացիական պայմանագիր» կուսակցության վարչության անդամ Նիկոլ Փաշինյանը կրկին հրապարակել է մեղադրանքների մի ամբողջ փաթեթ գրեթե բոլոր տեսանելի ընդդիմադիր կուսակցությունների մասին:

Մեջբերենք նրա խոսքերից մի հատված՝ առանց մեկնաբանությունների.

«Վարդան Օսկանյանը Սերժ Սարգսյանի արտգործնախարարն է եղել, երբ Սարգսյանը վարչապետ է եղել, ու հանուն նրա` Բաղրամյան 26 գնալու, միջազգային ատյաններում արդարացրել է ժողովրդի սպանդը:

ՕԵԿ-ը 2008-ին դե ֆակտո, 2013-ին դե յուրե` նախագահականում Սերժ Սարգսյանի թեկնածությունն է պաշտպանել ու եղել է կոալիցիայի մաս:

ԲՀԿ-ն 2008-ին դե յուրե, 2013-ին դե ֆակտո` պաշտպանել է Սերժ Սարգսյանի թեկնածությունը:

«Լուսավոր Հայաստան»-ի ներկայացուցիչը վստահության քվե է տվել Հովիկ Աբրահամյանի ու Տիգրան Սարգսյանի կառավարությանը:

ՀԱԿ-ի մասին. Տեր-Պետրոսյանի ու Սերժ Սարգսյանի շփումը նամակագրության ժանրում, հուլիսի 22-ի հայտարարությունը «Սասնա ծռերի» մասին, խայտառակ հայտարարություն է` Սարգսյանի ռեժիմը պաշտպանող ու հովանավորող: 4+4+4 ձևաչափով բանակցություններն էլ համարում եմ մարիոնետային...»:

Բոլոր ճակատներում ծախված լինելու Փաշինյանի պնդումները, ինչ խոսք, անպատասխան չեն մնա: Բայց հիմա էականը դա չէ, այլ այն, որ վաղը, սա լսելուց հետո, ցանկացած իշխանամետ կարող է հայտարարել. «Խնդրեմ, դա էլ հո մենք չե՞նք ասում, ձեր ընդդիմության թևից են մեղադրում»:

Եվ ամեն անգամ, հենց առիթը ներկայանա, նրանք հղում կկատարեն Նիկոլի խոսքերին՝ իրենց մտքերը թողնելով ավելի լավ ժամանակների համար:

Այդ պատճառով էլ վաստակավոր ընդդիմադրի տիտղոսը դեռ թափուր է, քանի որ մինչ օրս չի հստակեցվել, թե հատկապես ինչ վաստակի համար այն պիտի շնորհվի:

shame.am