Այսօր երեկոյան կայացավ ՀՀԿ ԳՄ նիստը, որից հետո, ավանդույթի համաձայն, լրագրողների հետ զրույցի դուրս եկավ ՀՀԿ խոսնակ, ԱԺ փոխնախագահ Էդուարդ Շարմազանովը, որպեսզի խոսի, սակայն ոչինչ չասի:

Եվ քանի որ նիստի օրակարգի, այնտեղ քննության առնված հարցերի մասին այդպես էլ ոչ մի տեղեկություն չստացվեց, հավաքվածները Շարմազանովից լսեցին նորանշանակ վարչապետի հասցեին մի սրտաճմլիկ գովերգություն, ճիշտ այնպիսին, ինչպիսին նա ժամանակին արտասանել էր Տիգրան Սարգսյանի ու Հովիկ Աբրահամյանի մասին:

Հետո հերթը հասավ տնտեսության վիճակին, որին Կարեն Կարապետյանն արդեն տվել էր «ծանր» բնորոշումը: Ու քանի որ այդ պահին Շարմազանովի խնդիրն էր հնարավորինս թեթևացնել նշված ծանրությունը, նա ասաց մի բան, ինչը շատ էր հիշեցնում խորհրդային տարիների պատմության դասագրքերը:

Այդ տարիներին եթե ցանկանում էին ցույց տալ, թե ԽՍՀՄ տնտեսությունն ինչքան է առաջ գնացել, համեմատությոեւն էին կատարում 1913 թվականի ցարական Ռուսաստանի տնտեսության վիճակագրական արդյունքների հետ: Հիմա էլ ՀՀԿ խոսնակն է նույն կերպ վարվում: «Մեր երկրի տնտեսությունն ավելի ծանր վիճակում է եղել 1990-ականներին:

Այն ժամանակ ՀՀԿ-ն և մեր կոալիցիոն գործընկերների ջանքերով տնտեսությունը վերականգնվել է, և մենք ապահովել ենք երկնիշ տնտեսական աճ: Հույս ունեմ, որ մեր երկրի տնտեսության համար լավ ժամանակներն առջևում են»,- ասաց նա:

Շարմազանովյան վերջին բացահայտումն էլ առնչվում էր նոր վարչապետին Ռուսաստանից բերելու փաստի հետ: Այստեղ նա մի փոքր զայրացավ ու ասաց. «Ինձ զարմացնում են բոլոր այն գնահատականները՝ հյուսիսից է եկել, հարավից, ոչ մի տեղից չի եկել, մարդը Հայաստանում ծնված- մեծացած մարդ է և Հայաստանից է եկել:Յուրաքանչյուրս կարող ենք գնալ և մեկ այլ երկրում աշխատել»:

Էդուարդ Շարմազանովը խորհուրդ է տալիս գնալ օտար երկրներ ու աշխատել այնտեղ, բայց ինքը, չգիտես ինչու, այդ բանը չի անում: Եվ հետո տնտեսության ու երկրի ապագայով այդքան մտահոգ ԱԺ փոխնախագահը չի էլ ուզում խորհել այն մասին, թե այդ ի՞նչն է ստիպում մարդկանց սեփական երկիրը թողած աշխատանք փնտրել ուրիշ պետություններում:

Գուցե այն երկնիշ տնտեսական ա՞ճը, որ իր գովերգած վարչապետներն են ապահովել:

shame.am