Մոսկվայում հինգշաբթի օրը Ռուսաստանի արտաքին գործերի նախարար Սերգեյ Լավրովն ընդունելու է Թուրքիայի քրդամետ Խաղաղություն եւ ժողովրդավարություն կուսակցության առաջնորդ Սելահաթին Դեմիրթաշին, որն ավելի վաղ հայտարարել էր, թե իր կուսակցությունն ունի Ռուսաստանի մայրաքաղաքում իր գրասենյակը բացելու մտադրություն։ Այցը տեղի է ունենում Մոսկվայի ու Անկարայի միջեւ դիվանագիտական հարաբերությունների սրման պայմաններում, ինչը թույլ է տալիս ենթադրել, որ Մոսկվան կարող է այս պայմաններում շահագործել Թուրքիայի քուրդ փոքրամասնությանը, որն առանց այն էլ խնդիրներ ունի երկրի իշխանությունների հետ։

Ինչպես Թուրքիայի քաղաքական վերլուծաբաններից շատերն են ասում, Դեմիրթաշի այցը կարող է առաջ բերել այն մտավախությունը, որ Թուրքիայում օրինական ճանաչված այս կուսակցությանը սատարելուց բացի, Ռուսաստանը կարող է նաեւ իր աջակցությունը հայտնել արգելված Քրդական աշխատավորական կուսակցության ապստամբներին։ 



Վերլուծաբաններից Մուրաթ Բիլհանի խոսքերով օրինակ, Քրդական աշխատավորական կուսակցության հետ երկարամյա հարաբերությունները Մոսվկան կարող է կիրառել որպես Դամոկլեսյան սուր։ Հիշեցնենք, որ Ռուսասատնը Քրդական աշխատավորական կուսակցությանը երբեք չի համարել ահաբեկչական կազմակերպություն։

Վերլուծաբաններից Աթիլլա Եսիլադայի խոսքերով էլ, Մոսկվան կարող է նաեւ աջակցել Ժողովրդավարական միություն կուսակցությանը` Սիրիայի քրդական մի խմբավորում, որին Անկարան մեղադրում է Քրդական աշխատավորական կուսակցության հետ սերտ կապեր ունենալու մեջ:

“Թուրքիայում ու Սիրիայում քրդերին թշնամիներ համարելու Թուրքիայի իշխանությունների քաղաքականությունը կարող է գործել ի վնաս հենց Թուրքիայի, երբ օրինակ Իրանը կամ Ռուսաստանը, ցանկանալով վնասել Թուրքիային` օգտագործեն Ժողովրդավարական միություն կամ Քրդական աշխատավորական կուսակցություններին”, ասում է վերլուծաբանը, ավելացնելով, որ չնայած Ժողովրդավարական միություն կուսակցությունը մինչեւ օրս լսել է ԱՄՆ-ի խորհուրդները, ամեն պահի կարող է փոխել իր դիրքերը, քանի որ Ռուսաստանը սկսել է զենք մատակարարել այս կուսակցությանը:

Վաշինգտոնը Սիրիայի Ժողովրդավարական միություն կուսակցության զինյալ խմբերին աջակցում է օդային գրոհներով ընդդեմ Դաեշի: Վերլուծաբանների խոսքերով, Մոսկվան կարող է պաշտպանել այս կուսակցությանը` Դաեշից գրավելու Սիրիայի սահմանային այն հատվածները, որոնք Աֆրինի գրեթե ինքնավար շրջանը բաժանում են Սիրիայի Քրդստանից: Անկարան նախազգուշացրել է, թե կմիջամտի, քանի որ այդ դեպքում Սիրիայի հետ սահմանի հիմնական մասը կանցնի քրդերի վերահսկողության ներքո` կտրելով Սիրիայի ապստամբ ուժերին Թուրքիայի կողմից մատակարարումներով ապահովող վերջին ուղին:

Նախկին դիվանագետ Այդին Սելչենը, որը Իրաքի Քրդստանի շրջանային մայրաքաղաք Էրբիլում ժամանակին բացել էր Թուրքիայի առաջին հյուպատոսությունը, կարծում է, թե Ժողովրդավարական միություն կուսակցությունը չէր ցանկանա վտանգի տակ դնել Վաշինգտոնի հետ իր հարաբերությունները:

“Այն այժմ առաջին անգամը լինելով, վայելում է ԱՄՆ-ի իրական ռազմական աջակցությունը: Այժմ այս կուսակցության վերահսկողության տակ գտնվող Ջազիրա քաղաքում կա ԱՄՆ-ի հատուկ ուժերի 3Օ զինծառայող: Եվ չեմ կարծում, որ հանուն Ռուսաստանի այս կուսակցությունը հրաժարվեր ԱՄՆ-ի հետ գործընկերությունից” – ասում է նա: 

Նրա խոսքերով, չնայած նրան, որ նախագահ Ռեջեփ Էրդողանը խոստացել է “երբեք չհրաժարվել Քրդական աշխատավորական կուսակցության դեմ պայքարից ու այս կուսակցությանը ոչնչացնել իր իսկ բնօրրանում”, Ռուսաստանի մեքենայությունների սպառնալիքը մեկ այլ պատճառ է, որ Անկարան Քրդական աշխատավորական կուսակցության հետ վերսկսի խաղաղության գործընթացը: