Գյումրին, կարծես, ձգտում է ապացուցել Հայաստանի քրեական մայրաքաղաքի մասին խոսակցությունների իսկությունը: Այս անգամ քրեական հանցագործի դերում է հայտնվել մի մարդ, որն ի պաշտոնե պե՛տք է պայքարեր հանցագործների դեմ:

iLur.am-ի հավաստի տեղեկություններով, գյումրեցի ճանաչված մարզիկ, հունա-հռոմեական ոճի ըմբիշ, օլիմպիական խաղերի մեդալակիր, Եվրոպայի եռակի չեմպիոն Արթուր Ալեքսանյանի նկատմամբ բռնություն է կիրառել ոստիկանության Շիրակի վարչության պետ Վարդան Նադարյանը:

Մեր աղբյուրը, որը անվտանգության նկատառումնեով գերադասեց անանուն մնալ, փոխանցեց. որ մայիսի 7-ի երեկոյան` Արթուր Ալեքսանյանն իր եղբայր Ռաֆայելի հետ, իր ավտոմեքենայով, պարապմունքից վերադառնալիս է եղել, երբ հետեւից ընթացող քաղաքացիական ավտոմեքենան ձայնային ազդանշանով նրան կանգ առնելու նշան է արել:

Լսելով ազդանշանը` Ալեքսանյանը կարծել է, որ մեքենան ճանապարհ է ուզում և «աջ է քաշել»: Երբ ետևից ընթացող մեքենան հավասարվել է Ալեքսանյանի վարած Մերսեդեսին, ըմբիշին ձայն է տվել մեքենայի առջեւի ուղևորատեղին նստած տղամարդը. «Բա էս լավ տղա եք, հա՞, խի՞ լավ աջ չես քաշում»: Ալեքսանյանը կանգնեցրել է մեքենան և եղբոր հետ իջել, նրանց «դիմավորել է» ոստիկանության գնդապետ Նադարյանը, որը, ըստ աղբյուրի ակնհայտ անսթափ վիճակում է եղել:  «էս լավ տղա եք, հա՞, հեսա գնանք քաղմաս, ձեզնից լավ տղա եմ սարքելու»,- ասել է Նադարյանը, հանել է մոտն եղած ատրճանակը ու դրա կոթով հարվածել Ռաֆայել Ալեքսանյանին (Ռաֆայելը նույնպես ըմբիշ է, մի շարք միջազգային առաջնությունների մեդալակիր): Ապա, Նադարյանն ատրճանակը լիցքավորել է եւ, պահելով Արթուր Ալեքսանյանի  կրծքին` ասել է. «Էդքան լավ տղա ես, կգաս բաժին, կխոսենք»:

Երբ ոստիկանապետի վարորդը զգուշացրել է, որ դիմացը «մեր չեմպիոնն է», Նադարյանը  մի պահ շփոթվել է, հետո հապշտապ նստել է մեքենան ու հեռացել:

Ըմբիշն իր մի քանի մերձավորների հետ ավելի ուշ գնացել է Գյումրու ոստիկանության բաժին՝ պարզաբանումներ ստանալու: Սակայն, ըստ մեր աղբյուրի, Նադարյանը խուսափել է հանդիպումից: Ավելին, ոստիկանության բաժանմունքն ընդհանրապես փակել են ներսից: Հաջորդ օրը բարեխոսության «առաքելությամբ» Ալեքսանյաններին սկսել են այցելել զանազան, այդ թվում՝ քրեական հեղինակություն համարվող մարդիկ ու իրավապահներ՝ միջնորդելով հարցին ընթացք չտալ: 

Սակայն, իր նկատմամբ նման ապօրինությունից վրդովված, Արթուր Ալեքսանյանը  մտադիր չէ գործը հենց այսպես թողնել: Մեր հավաստի տեղեկություններով, քննարկվում է կա՛մ Հայաստանի դրոշի տակ հանդես չգալու տարբերակը, եթե լկտի ոստիկանը արժանի պատիժ չստանա, կա՛մ հացադուլ հայտարարելը գյումրեցի մարզիկների հետ միասին, որոնք նույնպես վճռական են տրամադրված: Նշենք, որ Արթուր Ալեքսանյանի եղբայրը մարմնական վնասվածք է ստացել գլխի շրջանում:

Մայիսի 7-ի միջադեպի մասին որեւէ պաշտոնական հաղորդագրություն չի տարածել, իսկ ըստ Գյումրիում շրջող խոսակցությունների` ոստիկանապետ Նադարյանն իր այս «քաջագործությունն» ուզում է բարդել որեւէ շարքային ոստիկանի ուսերին: Ավելի ուշ, iLur.am-ի հետ զրույցում ոստիկանության լրատվական ծառայության աշխատակից Արմեն Մալխասյանը կտրականապես հերքեց լուրի իսկությունը: «Նման բան չի եղել», - հակիրճ ասաց նա՝ հրաժարվելով լրացուցիչ մեկնաբանություններից:  

Ի դեպ, նախկինում Վարդան Նադարյանը բազմիցս նշել է, որ ՀՀ ոստիկանապետ Վովա Գասպարյանի հետ մտերիմ ընկերական հարաբերությունների մեջ է: Նա Շիրակի ոստիկանապետի պաշտոնում այս տարվա հունվարին փոխարինել է Կարեն Բաբակեխյանին՝ Գյումրիի ազդեցիկ հանցավոր խմբավորումների պարբերական բախումների ֆոնին: Ուշագրավ է, որ Նադարյանի նշանակման առիթով Վովա Գասպարյանը վստահեցրել է հասարակությանը, որ չի հանդուրժի «ոչ մի քավոր-սանիկ-բարեկամ եւ մոտիկ հարաբերություններ». «Կհանեմ համազգեստի մեջից բոլոր այն ոստիկաններին, ովքեր կղեկավարվեն այս սկզբունքներով», - ասել է նա:

Վարդան Նադարյանի անունը մեկ այլ աղմկահարույց պատմության ենթատեքստում հայտնի դարձավ դեռեւս 2012-ին, երբ նա զբաղեցնում էր ոստիկանության Գեղարքունիքի մարզային վարչության պետի պաշտոնը: Ըստ մամուլի հրապարակումների, մեքենան սխալ կայանելու համար Նադարյանը վիճաբանել, ապա՝ ծեծի էր ենթարկել Գեղարքունիքի մարզպետի տեղակալի որդի Սեւակ Ստեփանյանին: Դեպքից մի քանի օր անց տուժածի հայրը հայտարարեց, թե իր որդին վնասվել է պատահաբար՝ «վազել ու ընկել է», թեեւ սեւանցիները թերահավատությամբ են վերաբերվում այս վարկածին: Ըստ որոշ տեղեկությունների, Ստեփանյանը մինչ օրս ամբողջությամբ չի ապաքինվել ստացած վնասվածքներից:  

ilur.am