Տիպիկ Բերիայի ձեռագիրն է. մեկին դավաճանի պիտակ էին կպցնում ու հետո ողջ գերդաստանին քշում սիբիրներ: 
Այս միջադեպը ՊՊԾ գունդը գրավելուց պակաս ցնցող չէ: 

Բանտում գտնվող Կյուրեղյան եղբայրների 60-ամյա մորը` տիկին Նվարդ Բելյանին Դավիթաշենի քննչական բաժնի կտրիճ քննիչները «կանդալներ» են հագցնում ու ներգրավում որպես մեղադրյալ: Ու ձեռի հետ ամենանողկալի, բայց և պրիմիտիվ «ակցիան» են կիրառում. խոհանոցի դանակը դնում են 60-ամյա կնոջ պայուսակի մեջ ու անօրինական զենք-զինամթերք կրելու մեղադրանքով քրեական գործ հարուցում:

Այդպես անում էին 1937 թվականին: Սրիկան ոչ դեմքն է փոխել, ոչ գործողությունների եղանակը: Բերիան նստած է մեր մե՞ջ: Պետական մակարդակո՞վ: Էս ո՞ր թիվն է:

Ոչ մի մայր, անգամ այդ քննիչների մայրը, չէր ցանկանա, որ իր բոլոր զավակները զենք վերցնեին ու արդյունքում հայտնվեին բանտում: Դուք ո՞նց եք ձեռք բարձրացնում մոր վրա, ո՞նց եք շինծու գործ սարքում: Ձեզ մայր չի ծնե՞լ:

Երեկ ՀՀ քննչական կոմիտեն հայտարարություն է տարածել, ըստ որի ուսումնասիրվել է ապօրինի սառը զենք կրելու դեպքի առթիվ Աջափնյակ ու Դավիթաշեն վարչական շրջանների քննչական բաժնում հարուցված քրեական գործը:

Պարզվել է, որ քրգործով կայացվել է Կյուրեղյան եղբայրների մայր Նվարդ Բելյանին որպես մեղադրյալ ներգրավելու որոշում` առանց բավարար հիմքերի առկայության: Քրգործն ուղարկվել է հսկողություն իրականացնող դատախազին` արձանագրված խախտումները վերացնելու միջնորդությամբ: Հանձնարարվել է ծառայողական քննություն նշանակել քննչական բաժնի համապատասխան աշխատակիցների նկատմամբ:

Դատելով Վովա Գասպարյանի երեկվա «պատժիչ» հրամաններից, կարելի է ենթադրել, որ այս քննիչներին, ովքեր Բերիայի առաքյալներն են քննչական համակարգում, ընդամենը նկատողություն կտան: Չէ` խիստ նկատողություն:

Իսկ մենք գտնում ենք, որ այդ քննիչներին պետք է վռնդել համակարգից, լուսանկարները տարածել համացանցով, որ այս օրերին տուժած քաղաքացիները երեսներին թքելու հնարավորություն ունենան:

nyut.am