Այս օրերին բոլորի նյարդերը ծայրահեղ լարված են, ցանկացած անզգույշ քայլ, խոսք, հայտարարություն կարող է իրավիճակը դուրս բերել հսկողությունից: Եվ ահա տեղեկություն է տարածվել այն մասին, որ ՊՊԾ գունդը զավթած զինված խմբի անդամներից Միայնակ Գայլի` Արայիկ Խանդոյանի մոր` տիկին Ռիմայի կենսաթոշակը կտրել են, նպաստը` դադարեցրել: Հասկանալի է, որ ամեն բանից անկախ, նման տեղեկությունը պիտի զայրույթ առաջացնի: Ծեր կինն ի՞նչ կապ ունի այսօրվա դեպքերի հետ, և առավել ևս թոշակների դադարեցումը ինչպե՞ս կարող է պայմանավորվել ներքաղաքական իրավիճակով:

Իսկ շատ չանցած պարզվում է իրականությունը: Ոչ մի բան էլ չի կրճատված: Համաձայն կարգի, տվյալ ամսվա կենսաթոշակները պետության կողմից վճարվում են ամսի 1-ից մինչև ամսի 15-ը: Հետևաբար, հուլիսի կենսաթոշակը վճարվել է հուլիսի 1-ից 15-ի միջակայքում: Իսկ ՊՊԾ գնդի գրավումը տեղի է ունեցել հուլիսի 17-ին, երբ տվյալ ամսվա կենսաթոշակն արդեն վճարված էր: Օգոստոսն էլ, հասկանալի է, դեռ չի եկել: Մի խոսքով, բացահայտ կեղծիք: Հիմա ինքներդ որոշեք, թե այդ նյութը թխած լրագրողը միայն փաղաքշանքների՞ է արժանի և միայն իրավունքնե՞ր ունի: Իսկ պարտականություննե՞րը:

shame.am