Էրեբունի և Նուբարաշեն դատարանում` դատավոր Լիզա Գրիգորյանի նախագահությամբ, քննվում է «Սևան» բժշկական կենտրոնի նախկին տնօրեն Արամ Նիկողոսյանի հայցն ընդդեմ «Հայկական ժամ» առցանց լրատվամիջոցի: Հերթական դատական նիստը նշանակված է հուլիսի 21-ին: Հայցվորը, բացի հերքումից եւ ներողություն խնդրելուց, նաեւ պահանջում է 1մլն դրամ գումար՝ որպես պատվին, արժանապատվությանը հասցված վնասի փոխհատուցում:

Դատարանի դիմելու պատճառը «Հայկական ժամ» կայքի հրապարակումն է, ըստ որի` մոտ երկու տարի առաջ Սեւան բժշկական կենտրոնի տնօրենի պաշտոնի համար հայտարարված մրցույթին տնօրեն Արամ Նիկողոսյանին վերընտրվելու երաշխիքների համար Սեւանի քաղաքապետ Ռուդիկ Ղուկասյանը մոտ 60 հազար ԱՄՆ դոլար է վերցրել՝ վարչապետ Հովիկ Աբրահամյանին տալու համար, սակայն Ա. Նիկողոսյանը չի վերանշանակվում, իսկ քաղաքապետն էլ գումարը ետ չի տալիս բժշկին:

Արամ Նիկողոսյանից հետաքրքրվեցինք, թե որքանո՞վ է այս տեղեկատվությունը համապատասխանում իրականությանը. «Դա սուտ ինֆորմացիա է, որով ուզում են ինձ վարկաբեկել: Ցավ այն է, որ որեւէ խոսակցություն չի եղել, տանը նստած իմ մասին կաշառքի հոդված են տպում, որ ես կաշառք են տվել, էն էլ, որ ես հիվանդանոցի տնօրենի մրցույթին չեմ մասնակցել: Ես դատի եմ տվել «Հայկական ժամ» կայքին, փաստաբանս զբաղվում է էդ գործով կամ պետք է կայքը ապացուցի, որ ես կաշառք եմ տվել, կամ էլ հերքում տա»:

«Հայկական ժամ» կայքը նաեւ գրել էր, որ մարզահամերգային համալիրի տարածքում գտնվող Հավանա սրճարանում Արամ Նիկողոսյանը, Սեւանի քաղաքապետ Ռուդիկ Ղուկասյանը, հանդիպել են կայքի խմբագրին ու հայտնել, որ վարչապետ Հովիկ Աբրահամյանը խիստ բարկացել է ու պահանջել ամեն գնով կորցնել այդ հրապարակումը:

Արամ Նիկողոսյանին հարցրինք արդյո՞ք այդպիսի հանդիպում տեղի է ունեցել, նա պատասխանեց. «Մենք խմբագրի հետ հանդիպել ենք, ասել ենք` ինչի համար էս գրել, ում պատվերն ես կատարում: Եթե մեզ կտաս այն աղբյուրը, որ քեզ էդ ինֆորմացիան տվել է, մենք քեզ հետ գործ չունենք: Խմբագիրն ասաց, որ տեղեկության աղբյուրը չեն բացահայտի, մենք էլ ավելացրինք, որ որքան շատ բաներ տպես, այնքան դատի կտանք: Թող դատարանում ապացույցի, որ ես Սեւանի քաղաքապետին կաշառք եմ տվել, եթե չապացուցեց, թող պատժվի, որ էլ սուտ բան չգրի»:

Արամ Նիկողոսյանին լսելուց հետո զրուցեցինք նաեւ Սեւանի քաղաքապետ Ռուդիկ Ղուկասյանի հետ. «Նախ դուք գրագետ մարդ եք: Առաջինը՝ իմ անունը Ռուդիկ է, ազգանունս՝ Ղուկասյան: Ես ձեր հոր թայն եմ, Ուդո չեմ, ո՞վ է մտցրել ձեր գլուխը: Երկրորդ՝ Արամ Նիկողոսյանի հերն էլ անիծեմ, կաշառք տվողի, վերցնողին էլ հետը: Դուք չեք հասկանում, որ հիվանդանոցի գլխավոր բժիշկ նշանակում է մարզպետը, ես ի՞նչ կապ ունեմ դրա հետ», ասաց քաղաքապետն ու անջատեց հեռախոսը:

Ըստ ամենայնի` նա նեղվել էր երեկ մեր թերթում հրապարակված լուրից, որում անդրադարձել էին Սեւանի ՏԻՄ ընտրությունների շուրջ զարգացող խմորումներին եւ հավանական թեկնածուներին:

Նելլի Կարապետյան

 hraparak.am