Հունիսի 4-ի երեկոյան Նուբարաշենի ճանապարհին հարազատ մոր աչքի առաջ դաժանաբար սպանված 58-ամյա Եղիշե Խաչատրյանի գործը անհավատալի ընթացք է բռնում:Դեպքի ականատես Մարիամ Գրիգորյանը, ով միաժամանակ կասկածյալներից մեկի` Արարատ Նիկողոսյանի ընկերուհին է, Asekose.am-ի հետ զրույցում խայտառակ հայտարարություններ է արել, կամ նույնն է, թե այդպիսի վկայություն է տվել, որից կարելի է ենթադրել, որ վերեւներում գործը հարթվել է: Չնայած հայկական իրականությունում հանցագործությունների «պարտակելու» տրամաբանությունը հուշում էր, որ հենց այսպես էլ լինելու է, որ ՀՀ արտոնյալ կամ այսպես կոչված էլիտար հանցագործների դասը, որը լկտիաբար հոշոտել էր մարդուն, մարդկայնին որեւէ երեւակայությունում չտեղավորվող ոճիր գործել՝ մոր աչքի առաջ դաժանաբար սպանելով զավակին, նույն լկտիությամբ իրականությունը գլխիվայր շուռ են տալու.քանի որ դեպքի հենց առաջին օրը լուրեր շրջանառվեցին, որ առնչություն ունեն բարձրաստիճան պաշտոնյանեից մեկի մերձավոր շրջապատի մարդիկ:
Ամենայն հավանականությամբ ականատես Մարիամ Գրիգորյանը հատուկ ցուցում է ստացել, թե ինչ վկայություն տալ, հիմա էլ այդ ամենը սպրդվում է լրահոս:
Հայտնի լեզվաբան, ԵՊՀ դասախոս, հայոց լեզվի թեստերի հեղինակ Փառանձեմ Մեյթիխանյանի 58-ամյա ամուսինը հունիսի 4-ին, ժամը 23-ին, «Ֆորդ Տրանզիտ» մակնիշի մեքենայով Նուբարաշենի խճուղու թիվ 1/5 հասցեի մոտ վիճաբանել է անհայտ ավտոմեքենայի վարորդի եւ ուղեւորների հետ, որի ընթացքում ստացած մարմնական վնասվածքներից մահացել է», սա ոստիկանության հաղորդագրությունից մեջբերում է, որը կցկտուր տեղեկություններ է հայտնում դեպքի մասին: Իրականում ըստ Եղիշե Խաչատրյանի ընտանիքի մտերիմների՝ դեպքը տեղի է ունեցել առանձնակի դաժանությամբ: Իր բարեկրթությամբ հայտնի Եղիշե Խաչատրյանը, տեսնելով «պրոտիվ» երթեւեկող մեքենային, փորձել է քաղաքավարի նախատել օրինազանց երիտասարդ վարորդին, նա նկատողություն է արել սխալ վարելու համար։ Վարորդը ընկերների հետ է եղել , ծանր է տարել դիտողությունն ու իջնելով ավտոմեքենայից հայհոյանքներ է տեղացրել, Խաչատրյանը հանդիմանել է, որ մոր հետ է, սակայն ապարդյուն, կողմերը ձեռնամարտի են բռնվել, իսկ ինչ-որ պահից միացել են եւս մի քանի հոգի ու Խաչատրյանին դաժանաբար ծեծելով սպանել են մոր աչքի առջեւ:
Այս գործով որպես մեղադրյալ ներգրավվել է 3 անձ` Խաչիկ Կոսյանը, Արտաշես Չիչոյանը և Արարատ Նիկողոսյանը:
Բայց, ահա, Մարիամ Գրիգորյանն ասել է, թե իբր որևէ մեկը չի ցանկացել դիտավորյալ վնաս հասցնել մյուսին եւ ամենաաբսուրդը,թե իբր դեպքը հրահրել է հանգուցյալը.«Այդ մարդը սկսեց վիրավորանքներ հասցնել: Տղաները տեսնելով տարեց մարդուն, փորձեցին լեզու գտնել և խոսքի միջոցով հարթել վեճը: Սակայն տղամարդն ինքն էր հրահրում տղաներին և թույլ չէր տալիս, որպեսզի կռիվն ավարտվեր: Տղաներն էլ, բնականաբար, սկսեցին պատասխան հարվածներ տալ, որն էլ դարձավ այս ամենի հետևանքը: Ես և այդ տղամարդու մայրը փորձում էինք բաժանել տղաներին, սակայն՝ ապարդյուն: Իմ կարծիքով այդ կինը ևս պետք է ճշմարտությունը պատմի: Նա ինքը տեսել է, որ իր տղան է սկսել ամենը, և տղաները միայն փորձել են պաշտպանվել ու հակահարված հասցնել: Եղել է ծեծկռտուք, որտեղ որևէ մեկը չի ցանկացել դիտավորյալ վնաս հասցնել մյուսին»:
Մարիամի խոսքով` ինքը զանգահարել է շտապօգնություն՝ փորձելով օգնել գետնին ընկած տղամարդուն, և մինչ շտապօգնության ժամանումը տղամարդը ողջ է եղել:«Ես ստուգեցի նրա զարկերակը, հասկացա, որ ողջ է, փորձեցի օգնություն ցուցաբերել, սակայն չստացվեց: Տեղի ունեցավ մի սարսափելի բան, որը չէր ցանկանա մեզանից և ոչ ոք»:
Նման բացատրությունից հետո միայն նողկանք է առաջանում նաեւ այն իրականության հանդեպ, որը մենք ենք հանդուրժում, սակայն այդով հանդերձ կան բազում մութ կետեր, որոնք լուսավորման կարիք են զգում, ավելի ճիշտ՝ ականատեսի խոսքում կան հակասական իրողություններ ու ակնհայտ է այն, որ սա կազմակերպված, նախապես լավ պլանավորված ցուցմունք է: Նախ այդ ինչպես ստացվեց, որ 58-ամյա տղամարդը, որը ըստ ականատեսի նկարագրածի՝ Ռեմբո էր ու անխնա ծեծում էր երեք երիտասարդի, մեկ էլ հանկարծ դարձավ անզգույշ հարվածի զոհ, ստացվում է, երկրորդ՝ անընդհատ պնդելով, թե իբր Խաչիկը դեպքի անմիջական մասնակից չի եղել եւ իբր հարակից ավտոտեխսպասարկման կենտրոնում է եղել, պարզորոշ երեւում է, որ ցանկանում են վերջինի մաքուր դուրս բերել գործից, քանզի գոնե նրա վրա այս հանցագործությունը ծանր կնստի, որովհետեւ 2010-ին նա մահացու վրաերթի է ենթարկել երկու երիտասարդ աղջկա:
Ամուր թիկունք ու հզոր հովանի ունեցող այս հանցախումբն արդեն կարելի է ասել գլխի ճարը տեսել է ու հնարավոր է հանգուցյալի ընտանիքի նկատմամբ ճնշումների հավանականությունը, մանավանդ , որ հանգուցյալի լեզվաբան այրին հայտնել է, որ կպայքարի մեղավորներին արդարացի պատիժ տալու համար: Մինչդեռ հենց այս անպատժելիությունն է, որ նոր ոճիրներ է ծնելու՝ սպառնալիք դառնալով մեր բոլորիս ապրելու իրավունքի վրա:
Անի Սահակյան

hayeli.am