38-ամյա Արմեն Կարապետյանի ընտանիքը թշվառության մեջ հայտնվեց, երբ ամիսներ առաջ տեղի ունեցած ավտովթարի հետևանքով գամվեց անկողնին: 4 տղաների հայրը, որ մինչ օրս հոգացել էր ընտանիքի հոգսը, այսօր ստիպված է դիմել հանրությանը:

Արմենն անչափահաս տղաների եւ կնոջ հետ բնակվում է Արարատի մարզի Նոր Խարբերդ գյուղում` կիսավեր մի տնակում: Տղաները` 10-ամյա Արմանն ու 9-ամյա Արսենը ,դպրոց են հաճախում, սակայն ոչինչ չունեն: Երեխաներն ամաչում են համադասարանցիներից, քանի որ հագուստները մաշված են, չունեն տետրեր, ալբոմներ, դպրոցական պայուսակներ, ամբողջ օրը տանը նստած են` դրսում խաղալու համար գնդակ կամ այլ խաղալիքներ էլ չունեն: Զրուցելով Արմենի կնոջ` Հասմիկի հետ, հասկացանք, որ ընտանիքն ամսական 40.000 դրամ նպաստով է գոյատևում, որով չեն հասցնում վերադարձնել կուտակված պարտքերը, գնել ամուսնու դեղորայքը, սնունդը և այլն: «Սնունդի խանութներում այլևս պարտքով հաց չեն տալիս:

Մեծ տղաներս խիզախ են ու դիմանում են քաղցին, ասում են, որ գիտեն փող չունենք, իսկ այ փոքրիկները քաղցից լացում են, ամենափոքրը չի քնում նույնիսկ» ,-պատմում է կյանքից դառնացած երիտասարդ կինը: 4-ամյա Հարությունի երազանքը սնիկերսն ու շարիկներով կոնֆետներն են, իսկ մայրը շատ բան չէ, ընդամենը ալյուր խնդրեց, սնունդ, հնարավորության դեպքում՝ լվացքի մեքենա, որ երեխաների հագուստները հասցնի լվանալ, առանց այդ էլ քիչ են, չեն չորանում:

«Ես մեծ սիրով մի տեղ կաշխատեի, բայց Արամիկս 1, 5 տարեկան է, ամուսինս անկողնային, չգիտեմ՝ ինչ կարելի է անել: Շուտով ձմեռ է` էս ավեր տնակն էլ տաքացնելու համար վառելիք չկա»,- հուսահատված դիմելով մեզ` կրկին սրտնեղեց կինը:

Այն, որ չենք կարող իսպառ վերացնել նրանց ընտանիքում տիրող աղքատությունը հասկանալի է, բայց գոնե առժամանակ փրկել սովից, ցրտից ու որոշ իրերի բացակայությունից, միանշանակ գոնե կարող ենք:

 Ընտանիքին օգնել ցանկացողները կարող են զանգահարել նշված հեռախոսահամարով՝ `093903902՝ Հասմիկ Կարապետյան: Արևիկ Հակոբյան

 hraparak.am