ՀՀ-ում ԵՄ պատվիրակության ղեկավար Պյոտր Սվիտալսկին այսօր շատ վատ բան է ասել: Վատ բան՝ կոռուպցիոներների համար: Նրա խոսքը գրեթե նշանակել է, որ Արևմուտքում արդեն հոգնել են Հայաստանի խոստումներից, հայտարարություններից, չիրագործված ծրագրերից, եկել է ժամանակը, երբ պետք է իրական գործերով ու փաստերով ցույց տալ արվածը:

«Ինձ թվում է՝ կառավարությունը և քաղաքացիական հասարակությունն ունեն ընդհանուր ընկալում ոչ միայն նոր պլանների, նոր բառերի, նոր հայատարարությունների:

Իմ կարծիքով, հայ ժողովուրդն ակնկալում է իրական փաստեր: Նրանք ակնկալում են տեսանելի ապացույցներ, որ կոռուպցիայի դեմ պայքարը առաջընթաց է ապրում Հայաստանում»,- նշել է Սվիտալսկին ու հետո ասել է մի բան, ինչն ընդհանրապես մեծ ցնցում է պատճառել մեր երկրում հակակոռուպցիոն պայքարի առաջամարտիկներին:

ԵՄ պատվիրակության ղեկավարը տեղեկացրել է, որ իրենք այս պահին ունեն բավականին կլորիկ մի գումար՝ նախատեսված Հայաստանի համար: «Ասեմ, ունենք 15 միլիոն եվրո հատկացված՝ օգնելու Հայաստանի կառավարությանը պայքարելու կոռուպցիայի դեմ: Բայց երբ որ ասում եմ՝ կա, հատկացված է, նկատի չունեմ, թե բաշխված է: Ծախսված չէ, որովհետև մենք բաց ու անկեղծ ենք կառավարության մեր գործընկերների հետ: Կան պայմաններ, մեզ պետք են կոնկրետ արդյունքներ, և եթե չտեսնենք նմանատիպ արդյունքներ, ապա այս 15 միլիոնը չի ծախսվի, չի փոխանցվի Հայաստանի կառավարությանը»,- հայտարարել է Պյոտր Սվիտալսկին:

Սա, ինչ խոսք, աղետին հավասարազոր մի բան է մեր պաշտոնյաների համար: 15 միլիոնի տեսքը նրանց համար թակարդի մեջ դրված պանրի պես գրգռիչ է: Ու հիմա քանի-քանիսն են լեզուները լպստում մի կտոր դրանից փախցնելու համար: Բայց արդեն գիտեն, որ հենց մոտենան՝ թակարդը շրխկալու է: Որովհետև այս անգամ փողը զոհ է ուզում: Իսկ իրենք բոլորովին չեն ցանկանում զոհաբերվել: Եվ այդ դաժան երկընտրանքը պարզապես սպանում է նրանց:

Ինչ լավ էր նախկինում: Փող էին տալիս ընդամենը խոստումների դիմաց: Հետո մի քանի տրցակ հաշվետվություն էին ստանում այն մասին, թե հայ պաշտոնյաներն ինչ զոհողությունների են գնում այդ հանցագործ կաշառակերների դեմ պայքարելիս, որքան ջանքեր են վատնում չարիքն արմատախիլ անելու համար: Ու կրկին փող էին ուզում՝ գործը հաղթական ավարտին հասցնելու համար:

Հիմա եվրոպացիները փչացրեցին այդ գեղեցիկ ու եկամտաբեր ավանդույթը: Եվ այս իրավիճակում ուրիշ ելք չկա: Պիտի զոհաբերել մի քանի յուրայինների, որ մյուսները կուշտ մնան: Եվ այս կապակցությամբ պետք է ասել, որ Գագիկ Խաչատրյանից լավը չկա, նա արդեն Նոր տարվա պատրաստի բուդ է` նրան դեռ էն գլխից չի սիրում վարչապետ Աբրահամյանը, նա թռել է նախագահ Սարգսյանի գլխից, ինչի արդյունքում ենթարկվել է պատժամիջոցների և զրկվել «U-com»-ի կեսից, ինչևէ, նա այն է, ինչ պետք է այսօր ՀՀ կառավարությանը:

Եվ 15 միլիոնը կլինի, և իշխանության վարկանիշը կբարձրանա, և Խաչատրյանի վիթխարի ունեցվածքը կարելի կլինի իրար մեջ վերաբաժանել:

Մի խոսքով, խոսում ենք հարյուրավոր միլիոնների օպերացիայի մասին: Կգնա՞ երկրի քաղաքական ղեկավարությունն այդ եկամտաբեր քայլին: