ՀՀ պաշտպանության նախարար Սեյրան Օհանյանը երեկ հյուրընկալվել էր Ազգային ժողովում և ԱԺ հանձնաժողովների նախագահների ու խմբակցությունների ղեկավարների հետ փակ ձևաչափով քննարկում էր մեր երկրի այսօրվա իրավիճակը։ Հանդիպումն այնքան փակ էր, որ հաշված ժամեր հետո ամբողջ Հայաստանը գիտեր, թե ներսում ինչ են խոսել: Ու թեև արծարծված հարցերից շատերն էին կարևոր, բայց խոսենք դրանցից մեկի մասին:

 ԲՀԿ խմբակցության ղեկավար Նաիրա Զոհրաբյանը Օհանյանից հետաքրքրվել է սպայական անձնակազմի, գեներալիտետի ու նաև հենց նախարարի ունեցվածքի և արտերկրում ձեռք բերված թանկարժեք անշարժ գույքի մասին, ինչին ի պատասխան Օհանյանն ասել է, որ իր մասով տարածված լուրերը բացարձակ ապատեղեկություն են, իսկ ինչ վերաբերում է գեներալիտետի ունեցվածքին, ապա մարդիկ ինչ որ ունեն, ձեռք են բերել ոչ թե բանակի, պետական բյուջեի հաշվին, այլ տարիների ընթացքում բիզնեսներ են դրել։

Ավելի զարմանալի ու տարօրինակ պատասխան դժվար էր սպասել պաշտպանության նախարարից: Դժվար է հավատալ, թե նա չգիտե, որ օրենքով դա արգելված է, և բանակի բարձրագույն ղեկավարության որևէ անդամ իրավունք չունի զբաղվելու բիզնես գործունեությամբ: Ու քանի որ վստահաբար գիտե դրա մասին, կնշանակի, որ ինքն էլ է մասնակից դառնում անօրինականությանը և երևի թե երբևէ նաև բացատրի՝ ինչպես ու ինչու:

Բայց մինչ հերթը կհասնի Օհանյանի բացատրություններին, նկատենք նաև, որ Ազգային ժողովում ևս նրա այդ հայտարարությունն ընդունեցին շատ հանգիստ ու անտարբեր: Իսկապես որ, ի՞նչ կա զարմանալու:

Խորհրդարանը ծայրից ծայր լի է բիզնեսով զբաղվող պատգամավորներով, ու ոչ մեկը դա չի արգելել: Օրենքն էլ հո իրենց համա՞ր չէ: Այստեղ օրենք գրում են, ոչ թե կատարում:

Եվ դրա համար էլ երեկվա փակ հանդիպումն ավարտվել է ԱԺ փոխխոսնակ Էդուարդ Շարմազանովի առավել քան բաց ու ինքնաբուխ բացականչությամբ, որը, դիմելով նախարարին, ասել է. «Շնորհակալ ենք, ինչ ասեմ, ախպեր ջան, ձեր կողքին ենք, ցավդ էլ տանեմ»։

Իրար կողքի: Կարևորը սա է: