Ուշագրավ լուր է հրապարակել «Հրապարակ»-ը : Հայերը Վրաստանով են թռնում արտերկիր, իսկ ահա հայաստանցի ցլերը՝ ինքնաթիռով:

Իրանցի ներկայացող ինչ-որ անձինք Էջմիածնի գյուղերը մաքրում են ցլերից: Թերթից տեղեկանում ենք.

«Հրապարակի» խմբագրություն է զանգահարել էջմիածնի գյուղերից մեկի բնակիչը և խնդրում Էր ահազանգել, որ խոշոր եղջերավոր անասունների մեծ խմբաքանակ են տանում Իրան։
Նա ասում Էր, որ նախկինում ոչխարների մեծ բանակ էին տանում, և դրա պատճառով մի շրջան ոչխարի միսը մեզանում միանգամից շատ թանկացավ, իսկ հիմա ցուլեր են գնում իրենցից։

Պարզվում է՝ իրանցի մի գնորդ Է հայտնվել Էջմիածնի գյուղերում, որը բանակցում է գյուղացիների հետ հայկական՝ տեղական ցլերի մեծ խմբաքանակ գնելու և Իրան տեղափոխելու մասին։
Ամենահետաքրքիրն այն Է, որ իրանցին ասել Է, թե ինքնաթիռով Է տանելու, հատուկ այդ նպատակով Դուբայից վարձակալած ինքնաթիռով, որը մոտ 40 տոննա տարողության բեռ Է տեղափոխելու։

Մեր զրուցակցի խոսքով, իրանցին թարգմանչի հետ շրջում Է Էջմիածնի գյուղերով և բանակցում հայկական ցլեր ունեցողների հետ։ Եվ իրենք ոչ թե ուրախանում են, որ իրենց անասունը հարմար գնով կվաճառեն, այլ դրա մեջ վտանգ են տեսնում, նորից գները կբարձրանան, ցլերի քանակը կնվազի, և հետագայում իրենք խնդիրներ կունենան՛՛:

Հ. Գ. Սա ինձ մի պատմություն հիշեցրեց. ամիսներ առաջ մի քանի անձինք էին եկել Վարդենիսի գյուղերից մեկը, ներկայացել որպես իրանցի, գյուղապետին ասել, որ ուզում են տուն գնել: Մի տուն էին մատնացույց արել, դրա համար 2500 դոլար էին տվել գյուղապետին՝ միամտացրել, հետո այդ տանն ինչ-որ բան փորփրելուց, հանելուց օրեր անց անհետացել: Հետո էր մարդկանց մեջ կասկած ընկել, որ եկվորները գուցե ադրբեջանցիներ են եղել՝ նախկին տեղաբնակներ:

Չի բացառվում, որ իրանցի ներկայացները նման մի ծրագրով եկած լինեն, բայց՝ ավելի գլոբալ. Հայաստանը զրկել գոյատևման վերջին միջոցներից…

Ամեն դեպքում պետք է անհապաղ արգելել ցլերի արտագաղթը:

lakmoes.am