Չնայած նրան, որ Արմեն Աշոտյանի օրերը հաշված են ԿԳՆ-ում, այնուամենայնիվ նախարարը «ծույլիկություն» չի անում իր վերջին աշխատանքային օրերին: ԿԳՆ պաշտոնական կայքէջից տեղեկանում ենք, որ Արմեն Աշոտյանն այնքան «խիստ է բարկացել», որ հրամաններ է ստորագրել մի շարք բուհերի նկատմամբ կարգապահական տույժեր կիրառելու վերաբերյալ: Մարդիկ կատակում են, թե Արմեն Աշոտյանը որոշել է մի վերջին «վատությունն անել», նոր դուրս գալ համակարգից:

Հայբուսակ համալսարան, Ավանդական բժշկության համալսարան, Մխիթար Գոշ հայ-ռուսական միջազգային համալսարան, Հայկական բժշկական ինստիտուտ, Սուրբ Թերեզայի անվան համալսարան, Երևանի մենեջմենթի համալսարան Գյումրու մասնաճյուղ. սրանք այն «խեղճուկրակ» բուհերի անվանումներն են, որոնց վրա Արմեն Աշոտյանի «ուժը պատել է»:
Այս օրերին մեզ միայն հաջողվեց կապ հաստատել Հայկական բժշկական ինստիտուտի հիմնադիր խորհրդի անդամներից մեկի հետ, Լևոն Ասատրյանը պատասխանեց hraparak.am-ի զանգին, մենք առաջինը հետաքրքրվեցինք սա առաջին անգամն է՞, որ կարգապահական տույժի են ենթարկվում.«Սա առաջին անգամն է, որ կրթության նախարարության հետ գործ ենք ունենում: Մի մանր բան էր, եթե գնաք նախարարություն և հարցնեք՝ ինչ-որ գլոբալ խնդիրներ եղե՞լ են, և հարցնեք, թե ինչի՞ համար է նման նկատողությունը, ուղղղակի անհասկանալի է: Ու քանի որ անցել էր սեպտեմբերից մինչև հիմա, այսինքն՝ 5-6 ամիս, ես զարմացա».- պատմում է Լևոն Աստրյանը:

Վերջինս խոսքերով՝ խնդիրը նրանում է, որ իրենք տարիներ շարունակ ենթարկվել ենք առողջապահության նախարարությանը.«Ամեն նախարարություն իր աշխատանքային կանոնակարգն ունի: Մենք առաջին անգամ տեղափոխվեցինք կրթության նախարարություն Աշոտյանի պահանջով, և ըստ էության նոր կարգերին իրենց, ոչ թե ընդհանուր պետական լիցենզիոն, այլ՝ նախարարության կողմից հաստատված ընթացակարգերի հետ, ծանոթ չէինք, մանր բաներ էին, կապված էին մեր բուհի հետ: Սա առաջին անգամն է: Ես զարմանում եմ, թե այս ինչ աժիոտաժ է: Պայմանագրի մեջ կա, մենք ասենք թե բազայի հետ՝ կլինիկական բազայի հետ կապված մենք աշխատում ենք, որոնց հետ ունենք պայմանագիր, այդ պայմանագրի մեջ գրել էին, պետք է անպայման գրել, թե տարեկան քանի ուսանող է գնում: Այս տարի կարող է գնալ 50 ուսանող, կուրսը 50 հոգի լինի, հաջորդ տարի կարող է գնալ 80 ուսանող, դրա համար մենք ուսանողների թիվը չենք նշում պայմանագրի մեջ: Ուղղակի նշում ենք, որ բազան պետք է հանդիսանա հայկական բժշկական ինստիտուտի ուսումնաարտադրական պրակտիկայի բազան, հիմա իրենք էլ նշում են, թե նախարարության կողմից հաստատման կարգն այնպիսին է, որ պետք է ամեն տարի դա կնքվի և գրվի ուսանողների թիվը: Եթե կարգն այս է, մենք կգրենք, սա է եղել խնդիրը»:

Տեղեկացնենք, որ պաշտոնական հաղորդագրության տեղեկություններով՝ բուհը կարգապահական տույժի է ենթարկվել բակալավրի և մագիստրոսի կրթական ծրագրերով գործունեություն իրականացնելու ընթացքում լիցենզիայի պարտադիր պահանջների և պայմանների խախտման համար (կլինիկական պրակտիկայի պայմանագրերում առկա, ինչպես նաև ուսումնամեթոդական ապահովվածություն:

Նյութի աղբյուրը ` hraparak.am