Հեղափոխությունից հետո հասարակությանը սպառնացող ամենամեծ վտանգը բևեռացումն է: Հայաստանում տեղի ունեցած թավշյա հեղափոխության առաջին փուլն այդ առումով բնորոշվում էր հանդուրժողականության ընդգծված շեշտերով: Հեղափոխության առաջնորդը՝ Նիկոլ Փաշինյանը, չէր հոգնում անընդհատ կրկնել, որ սա սիրո և հանդուրժողականության հեղափոխություն է:

Սակայն այսօր արդեն, երբ ըստ էության հեղափոխությունը տեղափոխվել է գործնական փուլ, անհանդուրժողականության մթնոլորտը ավելի ընդգծված է դարձել, և որ ամենավատն է՝ դա արտահայտվում է ընդդեմ խոսքի ազատության:

«Հրապարակ» օրաթերթի հրապարակումներից մեկը բուռն քննարկման թեմա էր դարձել համացանցում: Իրենց՝ հեղափոխության և Նիկոլ Փաշինյանի աջակիցներ հայտարարած մի խումբ մարդիկ սպառնալիքներ և վիրավորանքներ են հնչեցրել «Հրապարակ»-ի և այնտեղ աշխատող լրագրողների հասցեին: Սա իսկապես անթույլատրելի և չափազանց մտահոգիչ երևույթ է, որը առաջին հերթին հակասում է հեղափոխության հիմնական գաղափարին՝ սիրո և հանդուրժողականությանը: Իրենց հեղափոխական հայտարարող մեր հայրենակիցները պետք է հասկանան, որ խոսքի ազատությունը ժողովրդավարության բացարձակ արժեքներից մեկն է, իսկ խոսքի ազատության գլխավոր սկզբունքը բազմակարծությունն է:

Կարելի է ցանկացած կերպ վերաբերվել ցանկացած լրագրողի կամ լրատվամիջոցի, կարելի է ընդունել կամ չընդունել, վստահել կամ չվստահել որևէ լրատվամիջոցի կամ լրագրողի հրապարակումներին, բայց պետք է ընդունել և հանդուրժողաբար վերաբերվել ցանկացած, այդ թվում նաև Ձեզ համար բացարձակ անընդունելի կարծիքին: Վստահ ենք, որ հեղափոխության հիմնական առաջնորդներին, հատկապես Նիկոլ Փաշինյանին կարիք չկա ներկայացնել խոսքի ազատության կարևորությունը և ցանկացած լրատվամիջոցի դեմ սանձազերծված արշավի դատապարտելիությունը:

Հիմնական խնդիրն այստեղից այն է, որ լրագրողի կամ լրատվամիջոցի հետ սպառնալիքների լեզվով խոսող շատ քաղաքացիներ հանդես են գալիս հեղափոխության անունից՝ որպես վարչապետ Նիկոլ Փաշինյանի ու նոր կառավարության պաշտպաններ ու համախոհներ:

Հեղափոխության այս ծայրահեղական պաշտպանները ներկա կառավարության կազմում գտնվող ցանկացած պաշտոնյայի մասին քննադատական ակնարկն անգամ ընդունում են որպես հակահեղափոխություն և անցնում հակահարձակման՝ օգտագործելով անթույլատրելի բառապաշար:

Լրատվամիջոցի դեմ սանձազերծված արշավի կապակցությամբ հայտարարություն է արել Մարդու իրավունքի պաշտպանի գրասենյակը և իրավացիորեն մտահոգություն հայտնել, որ իրավապահ մարմինները չեն արձագանքել լրատվամիջոցի դեմ ուղղված հրապարակային սպառնալիքներին: Ընդ որում ուշագրավ է, որ հեղափոխական մոլուցքով տարվածները ոչ միայն չեն ընդունում իրենց պատկերացումներին չհամապատասխանող ԶԼՄ-ների հրապարակումները, այլև հարձակում են գործում յուրայիններիի վրա, եթե վերջիններս կառուցողական մոտեցում են արտահայտում նախկին իշխանությունների կամ կառավարման համակարգի վերաբերյալ:

Օրինակ՝ վարչապետի խորհրդական Արսեն Խառատյանի՝ Հանրային հեռուստաընկերության եթերում արած հայտարարությունը, թե Արցախի բանակցային գործընթացում կարելի է օգտագործել նախկին նախագահ Սերժ Սարգսյանի ներուժը, բառիս ամենաուղիղ իմաստով դատափետվեց: Մինչդեռ մարդը նորմալ, կառուցողական առաջարկություն էր ներկայացնում. ի վերջո բոլոր նախկին նախագահները համարվում են պետական խորհրդականներ, և նրանց ունեցած պետական փորձը ի շահ երկրի ծառայեցնելը քաղաքական նոր մշակույթ է, որը պետք էր միայն ողջունել: Բայց պարզվում է՝ որոշ մարդիկ Պապից ավելի կաթոլիկ են և պաշտպանում են հեղափոխությունը անգամ Նիկոլ Փաշինյանի խորհրդականից:

Շարունակությունը՝ այստեղ: