« Demarsh.am » -ը գրում է. Հայաստանյան 5 հեռուստաալիքների («Արմենիա Թի Վի», «Ա Թի Վի», «Արմնյուզ», «Երկիր Մեդիա», «Շանթ») եթերի վաճառքն իրականացնում է «Մեդիա Ինթերնեշնլ Սերվիսիզ» (ՄԻՍ) ընկերությունը, որը Հայաստանի գովազդի շուկայում ունի գերակա դիրք: 

Հեռուստատեսային գովազդը նախաձեռնում և իրականացնում են երեք սուբյեկտներ` պատվիրատուն, գովազդ արտադրողն ու հեռարձակողը: 2013 թվականից, երբ Հայաստանում ստեղծվեց առաջին sales house-ը՝ «Մեդիա Ինթերնեշնլ Սերվիսիզ» (Media International Services) ընկերությունը, որը կարգավորում է գովազդի վաճառքն ու հեռարձակումը, երկու օղակները՝ պատվիրատուն եւ հեռարձակողը, այլևս ղեկավարվում են մեկ կենտրոնից: Այս ընկերությանն են պատկանում նշված հինգ հեռուստաալիքներով գովազդի վաճառքի բացառիկ իրավունքները:

Ուսումնասիրությունները վկայում են, որ «Մեդիա Ինթերնեշնլ Սերվիսիզ» սեյլս հաուսը միջինում տիրապետում է հեռուստաալիքների համախառն բյուջեների 74%-ին, ինչը հակամենաշնորհային կարգավորման մասին ՀՀ օրենսդրության պահանջների ակնհայտ խախտում է: Ընկերությունը հեռուստալիքների հետ իր գործակցությունը կազմակերպում է բացառապես գովազդային գործակալությունների միջոցով։ Հայաստանում հեռուստագովազդի գնորդի շուկայում իր հերթին գերակշռող դիրք է զբաղեցնում «ՊանԱրմենիան Մեդիա Գրուպ» հոլդինգը (ՊԱՄԳ), որի կազմի մեջ մտնող հեռուստաընկերությունները տիրապետում են շուկայում գովազդային բյուջեների 46%-ին: Հայաստանում գործող այս խոշորագույն մեդիա միավորման՝ ՊանԱրմենիան Մեդիա Գրուպ ընկերութան մեջ ընդգրկված են նույն «Արմենիա», «Արմնյուզ», «Ա թի-վի» հեռուստաընկերությունները, ԱՄՆ-ում գրանցված Պանարմենիան Թի Վի ընկերությունը,  Ռադիո ջանը և Լավ ռադիոն, Tert.am, Blognews.am կայքերը, ինչպես նաև ՊանԱրմենիան Մեդիա գովազդային գործակալությունը:

«ՊանԱրմենիան Մեդիա Գրուպ»-ը եւ «Մեդիա Ինթերնեշնլ Սերվիսիզ»-ը փաստացի հանդես են գալիս որպես մեկ բիզնես միավոր և քաղաքականություն թելադրում հեռուստագովազդի շուկայում: Տարօրինակ զուգադիպությամբ ՊԱՄԳ-ի խորհրդի նախագահը և գլխավոր տնօրենը Արմեն Արզումանյանն է, ՄԻՍ-ի գլխավոր տնօրենը՝ Արմեն Արզումանյանի եղբայրը՝ Արամ Արզումանյանը:

Այս ընկերությունները համակարգված գործունեություն են իրականացնում ոչ յուրային հեռուստաալիքներին շուկայից դուրս մղելու համար՝ իրենց կազմի մեջ ընդգրկված հեռուստաալիքներով գովազդ հեռարձակելու համար  կիրառելով մինչեւ 35% զեղչի մեխանիզմ և գովազդատուներին ուղղորդելով  դեպի այս այս հինգ հեռուստաալիքներ։

«Մեդիա Ինթերնեշնլ Սերվիսիզ»-ը գովազդի վաճառքն իրականացնում է ոչ թե րոպեներով, այլ հեռուստաալիքների վարկանիշով, և եթե վաճառված գովազդային ծավալները դիտարկվում են ոչ թե րոպեներով, այլ համախառն վարկանշային միավորներով՝ wGRPs-ով, ապա ստացվում է, որ «Մեդիա Ինթերնեշնլ Սերվիսիզ» սեյլս-հաուսին պատկանող հինգ  հեռուստաալիքները վաճառել են գովազդի հասանելի ծավալի 81%-ը:

Այս իրավիճակը հայտնի է բոլորին, բայց, որպես կանոն, բոլորը լռում են ավելորդ խնդիրների մեջ չընկնելու համար: Բացառություն էր միայն «Օրինաց երկիր» խմբակցության քարտուղար Մհեր Շահգելդյանը, ով 2016 սեպտեմբերի 15-ին, նախորդ գումարման խորհրդարանում բարձրաձայնեց հեռուստաընկերությունների գովազդային շուկայի կենտրոնացված լինելու մասին։ Ավելին, Շահգելդյանը հայտարարությունից հետո դիմել էր ՀՀ տնտեսական մրցակցության պաշտպանության պետական հանձնաժողով՝ հասկանալու համար՝ ինչ քայլեր են ձեռնարկվել գովազդի շուկան վերահսկելու և մենաշնորհի դեմ պայքարելու ուղղությամբ:

Արտակ Շաբոյանի հանձնաժողովը պատգամավորի ելույթի հիման վրա տևական ժամանակ ուսումնասիրություններ էր իրականացնում: Չմանրամասնելով ասենք, որ հայկական լրատվական դաշտում Միքայել Մինասյանի մեդիակայսրության մենաշնորհը շարունակում է մնալ անսասան։ Ու մի տեսակ տարօրինակ է, որ այս իրողությունը անհանգստացնում է միայն ՕԵԿ-ին։