1in.am-ը գրում է.
Երևանի փոխոստիկանապետ Վալերի Օսիպյանի եղբորորդու մասնակցությամբ դանակահարության և Վալերի Օսիպյանի դեմ հատուկ քննչական ծառայությունում հարուցված քրեական գործերը դեռևս նախաքննական փուլում են և էական տեղաշարժ չկա: Միայն Օսիպյանի գործողությունների դեմ ՀՔԾ բողոք ներկայացրած Սմբուլ Հովհաննիսյանն է պարբերաբար կանչվում հարցաքննության: Երեկ նա կրկին մի քանի ժամ հարցաքննվել է ոստիկանությունում:
Վերջինս «Առաջին լրատվական»-ի հետ զրույցում նշեց, որ ինքը առերեսում է պահանջել դանակահարված երիտասարդի՝ Վանուշ Ալեքսանյանի մոր հետ, քանի որ «վերջիններս իրենց լռության դիմաց լավ կաշառվել են, գործից դուրս են եկել, և հիմա ամեն ինչ նախաքննական մարմնի կողմից փորձ է արվում տանել լրիվ այլ ուղղությամբ»:
«Ես ուզում եմ տուժածի մոր հետ առերեսվել, քանի որ էդ կինը վերցրել ա իրա կաշառքը ու գնացել իրա գյուղում հող ա մշակում: Սեթոյի մայրն էլ իրա հերթին ա հագած-կապած կայֆավատ ըլնում, իսկ ես ոմն Վանուշի կամ Սեթոյի պատճառով պիտի կրակն ընկնե՞մ, ամեն օր գնամ ոստիկանություն գա՞մ:
Ես պիտի էդ կնոջը հարցեր տամ, թե ոնց եղավ՝ ինքը չի տեսել, որ Սեթոն է դանակով խփել իր տղուն: Ինքը էդտեղ էր, 100 տոկոս տեսել է ու էնպես էր գոռում, որ ամբողջ երկու շենք լսել է, ու հիմա՝ կաշառքը վերցնելուց հետո, ասել է, թե բան չի տեսել: Էդպես ո՞նց կլինի: Իրա տղուն դանակեն, հետո փողը տան՝ բերանները փակեն, ու ես ու իմ տղան կրակն ընկնե՞նք»,- դժգոհեց տիկին Սմբուլը:
Հիշեցնենք, որ Վալերի Օսիպյանի եղբորորդու մասնակցությամբ դանակահարությունը տեղի էր ունեցել հունիսի 1-ին, որից հետո Սմբուլ Հովհաննիսյանի պնդմամբ՝ Վալերի Օսիպյանը իրեն գործարք է առաջարկել` խնդրելով, որ իր եղբորորդու կատարած դանակահարությունը Սմբուլ Հովհաննիսյանի տղան իր վրա վերցնի:
Օսիպյանն ասել էր, որ նրա ազգանունը ուրիշ է, ինքը կկարողանա օգնել այդ տղային, բայց իր եղբորորդուն օգնելը դժվար կլինի, քանի որ նույն ազգանունն են կրում:
Հիշեցնենք նաև, որ Օսիպյանի եղբորորդին այս պահին փախուստի մեջ է: «Ինչի՞ միջազգային ռոզիսկ չեն տալիս: Ինչի՞ Սեթոյին չեն գտնում բերեն: Թող բերեն ասի՝ որը որից հետո էր եղել: Սեթոյի հերն ասում ա՝ լավ ա, տղա եմ ունեցել, որ ծակի, պտտի, ես էլ փող տամ հանեմ: Բա եղա՞վ՝ էն ընդեղ ծակի, պտտի, փող տա հանի, տուժողն ընդեղ փող վերցնի, իսկ արդյունքում իմ տղան քաշվի՞: Տենց բան չի լինի, ես տենց բան թույլ չեմ տա՝ ով էլ լինի իմ դիմացը»,- հայտարարեց տիկին Սմբուլը: