«Հայելի»-ն գրում է.

Ըստ քննչական կոմիտեի տարածած պաշտոնական հաղորդագրության՝ հանրապետությունում 2017 թվականին գրանցվել է 20.284 հանցագործություն՝ 2016 թվականի 18.764 դեպքի դիմաց։ Այսինքն՝ նկատելի է հանցագործությունների աճ՝ շուրջ 8,1 տոկոսով, ինչը հիմնականում պայմանավորված է ճանապարհային երթևեկության և տրանսպորտային միջոցների շահագործման կանոնների խախտման, գողության դեպքերի աճով։

Հատկանշական է, որ վերլուծելով նույն տվյալները՝ ոստիկանությունը հանգել է բոլորովին այլ եզրահանգման. «Հաշվետու տարում հանրապետությունում գրանցված հանցագործությունների ընդհանուր թվաքանակն աճել է 8,1%-ով կամ 1520 դեպքով (2016թ.` 18.764, 2017թ` 20.284), ինչը հիմնականում պայմանավորված է ոչ մեծ ծանրության հանցագործությունների թվի աճով, ինչը հանցագործությունների հայտնաբերման և հաշվառման աշխատանքների բարելավման արդյունք է»,- նշվում է police.am պաշոտնական կայքում:

Ավելին, եթե քննչական կոմիտեում հանցագործություններր թվի աճը պատճառաբանում են ՃՏՊ կաննոների խախտման և գողության դեպքերի աճով, ապա ոստիկանությունը իր տարեկան հաշվետվության մեջ հանցավորության աճի պատճառների մեջ ՃՏՊ-ն ընդհանրապես չի դիտարկել, իսկ գողության դեպքերի մասով, 2016 թվականի համեմատությամբ, անգամ բարելավում է արձանագրել:
«Միևնույն ժամանակ, 34-ով կամ 17,2%-ով նվազել է առանձնապես ծանր (198-164) և 352-ով կամ 11,4%-ով ծանր հանցագործությունների (3.081-2.729) թիվը, ինչը հիմնականում պայմանավորված է սպանությունների, սպանության փորձերի և բնակարանային գողությունների թվի նվազման հետ:
Առանձին ուղղություններով, հիմնականում նվազել են սպանության (66-49), սպանության փորձի (36-23), դիտավորությամբ առողջությանը վնաս պատճառելու (1.149-1.113), այդ թվում` ծանր (200-194), սեռական անձեռնմխելիության դեմ ուղղված (118-102), այդ թվում, ավազակության (53-46), կողոպուտի (255-183), բնակարանային գողության (1250-889) և տրանսպորտային միջոց փախցնելու (49-44) դեպքերը»,- նշված է ոստիկանության պաշտոնական հաշվետվության մեջ:

Այս խորհրդանշական անհամապատասխանությունը, որով կարելի է նաև գնահատել երկու իրավապահ կառույցների գործունեության անհամապատասխանությունը, թերևս ունի լրացուցիչ պարզաբանման կարիք: Հատկանշական է, որ քննչական կոմիտեն հատուկ շեշտադրել է, որ իրենց վարույթում քննվել է հանրապետությունում 2017 թվականին արձանագրված հանցագործությունների դեպքերի առթիվ հարուցված քրեական գործերի 90,7 տոկոսը, իսկ մնացած դեպքերի առթիվ հարուցված քրեական գործերը՝ 9,3 տոկոսը, քննվել են ՀՔԾ-ի, ԱԱԾ-ի քննչական վարչության և Պետական եկամուտների կոմիտեի քննչական վարչության վարույթներում։

«ՀՀ ՔԿ ստորաբաժանումների վարույթում քննված քրեական գործերով օպերատիվ-հետախուզական մարմինների հետ համատեղ ձեռնարկված մեծածավալ և համագործակցված գործողությունների արդյունքում հաջողվել է ապահովել բազմաթիվ ծանր և բազմադրվագ հանցագործությունների բացահայտումը։ 2017 թ. ընթացքում ընդհանուր հանցագործությունների բացահայտման ցուցանիշն աճել է 4.8 %-ով՝ կազմելով 83.3%՝ 2016թ-ի 78.5%-ի դիմաց, որից ծանր հանցագործությունները՝ 60%՝ 2016թ.-ի 54.2%-ի դիմաց»,- նշվում է ՔԿ-ի տարածած հաղորդագրության մեջ: Հատուկ շեշտվում է նաև, որ իրավասու այլ մարմիններից քրեական գործերով անհրաժեշտ ապացույցների ձեռքբերման, դրանք սեղմ ժամկետներում ստուգելու ուղղությամբ ներդրված կառուցակարգերի, քննությունը ճիշտ պլանավորելու, ճիշտ կազմակերպելու արդյունքում կրճատվել են նախաքննության ժամկետները։

Այսինքն, ի տարբերություն ոստիկանության, որը չի կարողացել ապահովել հանցավորության մակարդակի նվազումը, քննչական կոմիտեն աշխատել է լավ՝ ապահովելով բացահայտման ցուցանիշների աճ՝«չնայած ՔԿ քննիչների զգալի ծանրաբեռնվածությանը»:

Ամբողջական նյութը սկզբնաղբյուր կայքում